KCK: Xurtkerdişê mucadeleyî gureyêko tarîxî yo

KCK: Ganî bêro dîyene, kenê ke komploya mîyanneteweyîye ya ke kewena serra 21’ine mîyanê Şerê Dinya yê 3’inî de bêro dewamkerdene û qirê Kurdan bêro ardene. Na yewe ra gureyêko tarîxî yo ke mucadele bêro xurtkerdene.

Hemserekîya Konseya Rayberdişî ya KCK’yî bi vîr vist ke serê esîrgirewtişê Rayberê Şarê Kurdî Abdullah Ocalanî ya komploya mîyanneteweyîye ra 20 serrî ravêrtî û vat, “Na komplo yew sûcanê tewr giranan ê hemverê merdimîye ra yew a ke tarîxî de cayê xo girewta. Înan ê ke cayê xo na komploye de girewto, bîyê hemparê sûcê qirkerdişî ke 100 serrî yo hemverê şarê Kurdî yeno kerdene. Şarê Kurdî yo ke şaranê kanan ê merdimîye ra yo, do bi hêzê ercanê xo yê xoverdayîşî û karakterê xo yê cimatî yê tarîxkîyî, do şebekeyê sûcê qirkerdişî teqez bin fîno. Xoverdayîşo ke ‘Şima nêeşkenê rojê ma tarî bikerê’ hemverê komploye de ame bicaardene, do teqez bi ser bikewo, Rayber Apo û şaro Kurd azad bibo.”

Eşkerayîya KCK’yî de wina ame vatene:

 ‘TESÎRÊ KOMPLOYA MÎYANNETEWEYÎYE XEYLÎ AME ZIHÎFKERDENE’

“Bi ruhê xoverdayîşê ‘Şima nêeşkenê rojê ma tarî bikerê’ hemverê komploya mîyanneteweyîye de 20 serrî yo mucadeleyêkê pîlî yeno dayene. Mucadeleyê azadîye yê şarê Kurdî serê xeta Rayber Apoyî de bêmabên dewam keno. Têkilîya mabênê Rayber Apoyî, Têgêrayîşê Azadîye û şarê Kurdî xurtir bi, têkilîya mabênê komplokaran de problemê muhîmî vejîyayî werte; tesîrê komploya mîyanneteweyîye xeylî ame zîhfkerdene.

Sîstemo sîyasî yê Rojakewtena mîyanêne yê seserra 20’ine serê qirkerdişê Kurdan ame awankerdene. Na yewe ra, hêzê mîyanneteweyîyî hemparê sûcê qirkerdişî yo ke dewleta Tirkî bica ana. Komploya mîyanneteweyîye ya 9’ê Teşrîna verêne 1998’an de dest pêkerde û 15’ê Sibat a 1999’an de Rayber Apoyî esîr girewt, bîye dewamê sîstemê qirkerdişê yo ke destpêkê seserra 20’an ame awankerdene. 

Bi komploya mîyanneteweyîye re ame waştene sîstemo ke serê qirkerdişê Kurdan ê Rojakewtena mîyanêne ameyo awankerdene. Labelê ewro tesîrê hêzanê komplokaran ê ke Rayber Apo esîr girewt kemî bîyo, komploye derezîyaya û perçe bena. No yew hetê şarê Kurdî ra ame kerdene ke 20 serrî yo bi dayîşê bedelanê giranan mucadele dano û Şerê Dinya yê 3’inî de hemleya demokrasî û azadîye rayra bena.

WAZENÊ KOMPLO MÎYANÊ ŞERTANÊ NEWEYAN DE BIDOMNÊ

Sere de dewleta Tirkî, hêzê dişmenê Têgêrayîşê Azadîye û yê ke polîtîkaya qirkerdişî serê şarê Kurdî de rayra benê, wazenê sîstemê Rojakewtena mîyanêne yo ke serê qirkerdişê Kurdan ameyo awankerdene, newe ra awan bikerê. Komploya ke serê bingeyê serra 1999’î ya hemverê Rayber Apoyî de amî kerdene, bi hedefkerdişê rayberdişê Têgêrayîşê Azadîye yê Kurdan wazenê berê sere. Qerarê DYA yê seba tasfîyekerdişê rayberdişê Têgêrayîşê Azadîye yê Kurdan, paştîdayîşê seba polîtîkaya dewleta Tirkîya ya qirkerdişê Kurdan o. No qeraro ke hemverê rayberdişê Têgêrayîşê  Azadîye de ameyo vetene, gama ke merdim kîşta tecrîdkerdişê Rayber Apoyî de biercno, vîneno ke wazenê komploya mîyanneteweyîye ya ke hemverê mucadeleyê azadîye yê şarê Kurdî amîya kerdene, mîyanê şertanê neweyan de bêro dewamkerdene.    

TÊGÊRAYÎŞÊ MA DEST BI HEMLEYA XOVERDAYÎŞÎ KERDA

Têgêrayîşê ma yê azadîye yo ke na rastîye dîya, dest bi hemleya xoverdayîşî ya ‘Ma do tecrîdî wedarê, faşîzmî birijnê û Kurdistanî azad bikerê’ kerdo. Sîyasetmedara demokratîke ya Kurdan Leyla Guvene dî tecrîdkerdişê Rayber Apoyî merkezê qirkerdişê Kurdan o, zext û tecrîdbîyayîşê şarî yo, naye ra dest bi grevê vêşanîye kerd. Leyla Guvene seba ke karakterê ameyoxî rind fam kerd, ramot ke bîya wayîrê karakterê rayberêka xurte ya şarî. Leyla Guvene ramot ke Têgêrayîşê ma yê Azadîye no proses rast wendo û wextê xo de bi însîyatîf werişta.   

MA BI HEMLEYE SERKEWTIŞÎ TACÎDAR BIKERÊ

Ganî bêro dîyene, kenê ke komploya mîyanneteweyîya ke kewena serra 21’ine mîyanê Şerê Dinya yê 3’inî de bidê dewamkerdene û qirê Kurdan bîyarê. Seba ke dewleta Tirkî û faşîzmê AKP-MHP’yî vînenê ke Kurdî şertanê Şerê Dinya yê 3’inî de xurt benê û do statuye bi dest bifînê, hêrişanê xo zêde kerdê. Îqtîdarê AKP-MHP’yî hem halêkê zihîfî de yo, hem zî paştîdayîşê mîyanneteweyîyî bi qaso ke wazeno nêgêno. Na rastî ramojnena ke gama mucadele bêro dayene, bi şikitişê tecrîdî û binfînayîşê faşîzmî azadkerdişê Kurdistanî nizd o.   

Şehîdê ma mucadeleyî payan ser o verdanê û hîna kenê xurt. Heta ke mucadeleyê azadîye bi ser bikewo bi na hişmendî û ruhê fedaîyî do xoverdayîş estbo. Xoverdayîşê ewroyî yê ‘Ma tecrîdî bişiknê, faşîzmî birijnê û Kurdistanî azad bikerê’ bi ruhê fedaîyî yê ‘şima nêeşkenê Rojê ma tarî bikerê’ ke dorê Rayber Apoyî de bîyî barîkat xurt beno. Temambîyayîşê serra 20’ine ya Komploya Mîyanneteweyîye de û serra ci yay 21’ine de reyna ma xoverdayoxanê ‘şima nêeşkenê Rojê ma tarî bikerê’ bi hurmet û minet bi vîr anê, ma reyna sond wanenê ke ma do tecrîdî bişiknê, faşîzmî birijnê û Kurdistanî azad bikerê.”