Komîteya Bawerî û Şaran a KCKyî Roşanê Çarşema Sor ê komelê êzidîyan bi eşkerayîyêke fîraz kerd.

Eşkerayîye wina ya:

''Ma Çarşema Sor pêro êzidîyan rê fîraz kenê. Ma hêvî kenê ke no roşan bibo wesîle ke bingeyê Neteweya Demokratîke û Xoserîya Şingale de rêxistinîya êzidîyan do pîlêr biba. Ancî na roje pêro kurdan rê fîraz biba û biba wesîleya haştîye, edalet û têdûştîye.

Emser zî êzidîyî binê hêrişanê dewleta tirke de Çarşema Sor pêşwazî kenê. Êzidîyî hedefê dewleta tirke û PDKyî de yê. Coka ganî êzidîyî hîna zaf mîyanê paştdayîş, rêxistinîye û awankerdişê komelê demokratîkî de bibê. Hema zî vera êzidîyan tehlukeyê qirkerdişî dewam keno. Eke komelê ma yê êzidîyan xopawitişî bihêzêr bikero, rêxistinîya cinî û ciwanan pîlêr bikero, giranîye bido xebatanê meclîsê şarî û sîstemê Îdareyê Xoserî aver bero cewabêkê tewr pîlî do bido hêrişan.

Dewleta tirke bi hişmendîya qirkere vera şaranê herême şerêkê topyekûnî kena. Dewleta tirke cerganê xo, şirîkanê xo PDK û dewletanê herême reyde kerd ke êzidîyan qir bikera. La êzidîyan vera ney tewirêko xurt mojna û îsbat kerd ke êzidîyî bi hêrişan do nêqedê. Bi nê xoverdayîşî Çarşema Sor hinî sey roşanê xoverdayîş, azadîye û estbîyayîşî zî yeno fîrazkerdene.

Şingal de bi qerardarî xîretê awankerdişê Xoserîya Demokratîke est o ke êzidîyê Şingalî bi nê sîstemê xo benê hêvîyê pêro êzidîyan. Bi ney Çarşema Sor û menga nîsane resenê manaya xo ya raştikêne. No ruh moral û xîretê pêro kurdan zî berz keno.

Sey Têgêrayîşê Azadîye yê Kurdîstanî ma 50 serrî yo seba azadîye û cuya hempare têkoşîn kenê. Nê têkoşînî de komelê ma yê êzidîyan zî şehîdê ercîyayeyî dayî û tim wayîrê nê têkoşînî vejîya. Sey Têgêrayîşê Azadîye ma zî soz danê ke çarçewa şîretanê Rayber Apoyî de do tim hetê komelê êzidîyan de bibê, wayîrê erj û bawerîyanê êzidîyan û pêro şaranê Kurdîstanî vejîyê û heta azadîya Kurdîstanî nêvinderê.

Bi wesîleya Çarşema Sor ma hêvî kenê ke yewîya êzidîyan zî do xurtêr biba. Ma şexsê embazanê xo Hacer, Binevş, Xanê, Berîvan, Mam Zekî, Mam Beşîr, Seîd Hesen, Dijwar (Mervan Feqîr), Zerdeşt Şengalî de pêro şehîdanê êzidîyan bi rêz û minetî yad kenê. Ma soz danê ke têkoşînê înan bi serkewtişî tacîdar bikerê.''