Hemserekîya Konseya Rayberdişî ya KCKyî bi eşkerayîyêke hêzê gerîlayan ê Metîna û Zapî semedê operasyonanê înan ê serkewteyan ê 19-20ê teşrîna peyêne fîraz kerdî.

Eşkerayîye wina ya:

''Şerwan û fermandaranê HPG û YJA-Starî rê;

Fermandarîya Qerargehê Merkezê Pawitişê Şarî (MPŞ) rayaumûmîye rê eşkera kerd ke 19-20ê teşrîna peuêne de Herêma Şehîd Delîlî ya Rojawanê Zapî û Metîna de vera artêşa tirke ya îşxalkere çalakîyê serkewteyî ameyê kerdene û nê çalakîyan de xeylêk mewzîyê dişmenî ameyê îmhakerdene û îşxalkerî ameyê cezakerdene. Seke Fermandarîya Qerargehê MPŞyî zî dîyar kerdo nê çalakîyan de derbê giranî dîyayê dişmenê kolonyalîstî. Nê çalakîyanê înan ê serkewteyan ra semed ma sere de şerwan û fermandaranê nê çalakîyan pêro gerîlayanê azadîye yê Kurdîstanî zerrî ra fîraz kenê; heskerdiş, selam û hûrmetê xo pêşkêş kenê. Ma Fermandarîya Qerargehê MPŞyî zî fîraz kenê.

Nê çalakîyan de embazanê ma Andok, Ciwan û Egîdî cepheyê tewr vernî de şer kerd û şehîd bîyî. Ma şexsê nê hîrê embazanê ma yê qehremanan de pêro şehîdanê demokrasî û şorişî bi heskerdiş û hûrmetî yad kenê, ma verê vîrameyîşê înan de bi hûrmetî sereyê xo anê war. Ma soz danê ke heta peynî perwerê şehîdan bibê û ser bikewê.

Bêguman afernayoxê esasî yê dewaya azadîya şarê kurdî û Kurdîstanî şehîdê ma yê. Şar û dostê ma ganî bi embazanê ma Andok, Ciwan û Egîdî sereberz bibê û bi xurtî wayîrê vîrameyîşanê înan vejîyê. Nê embazê ma kesayetê Apogîr ê ke embazîya Erdal û Rojhatan kerda, bê teredut seba azadîye ganê xo feda kerdo.

Gerîlayan bi nê derbanê giranan ancî îsbat kerd ke ê pawitox û şerwanê Kurdîstanî yê û do qetî rayîr nêdê îşxalkeran. Şerê gerîlayan ê vera artêşa îşxalkere pawitişê Kurdîstanî yo. Gerîlayî bi ruhê fedayîyî Kurdîstanî vera îşxal, qirkerdiş û îxanetî pawenê. Şarê Kurdîstanî yo welatperwer ganî hîna zaf destek bido nê xoverdayîşê gerîlayan, bi xurtêrî tewrê têkoşînî bibo û têkoşînî pîlêr bikero.

Ancî girîng û manadar o ke nê çalakîyî bi wesîleya serrgêra 45. ya ronîyayîşê PKKyî ameyê kerdene. Bi na wesîle ma zî sere de embazanê ma yê Herêma Şehîd Delîlî û Metîna rê pêro şerwan û fermandaranê HPG û YJA-Starî rê serra 45. ya partîya ma fîraz kenê. Ma serra 46. ya partîye de têkoşîn û xoverdayîşê nînan rê serkewtiş wazenê.''