Komîteya Tekîlîyanê Teberî ya KCKyî derheqê qerarê ko Wezîrîya Karanê Teberî yê Amerîka yê vera Têgêrayîşê Azadîye yê Kurdîstanî girewto de eşkerayîye daye.

Eşkerayîya KCKyî de bale ameye antene nê xususan ser:

''20ê nîsana 2018î de Wezîrîya Karanê Teberî yê Amerîka derheqê hîrê şorişgêranê ke kadroyê serkêşî yê Têgêrayîşê Azadîye yê Kurdîstanî yê de qerar girewt. No qerar 2021 de ame newekerdene. Amerîka bîlasebeb bi sûcdarkeridşê xeyalî şarî ra wazena ke wa ci rê ajanîye bikero û zirar bido nê hîrê embazanê ma. No qerar û sûcdarkerdiş meşru nîyo. No  vera wîjdanê şarê kurdî û Amerîka nêzdîbîyayîşo ercan o. Heta nika ne Rayber Apo, ne hîrê embazê ma qet yew endamê/a PKKyî û têgêrayîşê Apoyî vera dewlete û şarê Amerîka çalakîyêke nêkerda û ê hedef nêkerdî. Amerîka rê tim sey hêzêkê bitesîrî yeno vengdayene ke wa semedê çareserkerdişê meseleya kurdî rolê xo kay bikero.

Sere de hîrê embazê ma û felsefe û mucadeleyo ke temsîlkarîya ci kenê kurdî, şarê Amerîka  û heme merdimîye belayo sey DAÎŞî ra xelisnayî. Qeraro ke Amerîka dayo vera hîsanê edaletî û wîjdanê şarê Amerîka yo. Eke Rayber Apo, hîrê hemrayê ma û bi hezaran serkêş û şehîdanê PKKyî ra nêbîyêne DAÎŞ bin nêkewtêne. DAÎŞ sey raştîya sîyasîyî yê Rojhelatê Mîyanênî mendêne. Amerîka sey Talîbanî DAÎŞ û çeteyanê dewleta tirke rê zî mecbur mendêne.

Êyê ke ganî bêrê muhakemekerdene sere de Erdogan û dewleta tirke yê ke îdeolojî û sîyasetê DAÎŞî rayra benê. Bi des hezaran çeteyî bi çar leteyanê dinya ra bi destê Tirkîya Sûrîye û Iraq de ameyî cakerdene. Nê çeteyî Tirkîya ser o şawîyaya Ewropa, Afrîka û Kafkasya ke qirkerdişan bikerê. Sûcê merdimîye ame kerdene. Tirkîya hem no verê çimanê Amerîka de kerd hem zî bi qebulkerdişê Amerîka wazena heme çeteyanê cîhadîstan rê sponsorîye bikero.

No qerarê Amerîka newekerdişê qerarê hîrê serran verê cu yo ke yeno manaya çarenêkerdişê meseleya kurdî. Îqtîdaro faşîst ê Erdogan û Bahçelîyî vera kurdan qirkerdiş keno. No qerar hemkarîya nê qirkerdişî yo. No qerar bazarîya leymin a. Amerîka wazena Tirkîya û Erdoganî razî bikero ke wa paştî bido sîyasetê ci yê herême. Semedê nayî serê gonîya kurdan û şaranê bînan de bazarîya leymine yena kerdene. Çarekerdişo demokratîk ê meseleya kurdî kilîtê heme problemanê Rojhelatê Mîyanên o. Amerîka bi nêqerarî wazena meseleya kurdî xorî bikerê ke wa Rojhelatê Mîyanênî de kriz, kaos û qirkerdişî dewam bikerê.

22 serrî verê cu Amerîka huqûq û qanûnê mîyanneteweyî û ehleq binpay kerdî, heme hêzê xo şuxulna û Rayber Apo sey esîrî teslîmê dewleta tirke kerd. 22 serrî yo Rayber Apo binê tecrîdê giranî de yeno tepiştene.  No sûcêko pîl ê sîyasî, ehleqî û merdimîye yo. Amerîka herinda vera rayberanê kurdan de têgêrayîşî de ganî şarê kurdî û şaranê Rojheletê Mîyanînî ra seba ke bîya sebebê esîrkerdişê Rayber Apoyî,ozrê xo biwazo. Amerîka bi nê sîyasetî meseleya kurdî bêçare verdaye û verê rişnayîşê gonîya bi hezaran kesan akerd. Selahîyetdarê Amerîka ganî helêke cuwa ver kurdan û şaranê xo ra ozrê xo biwazê. Ganî semedê raştkerdişê nê xetayê xo yê tarîxî cehd bikerê. No zî azadîya Rayber Apoyî û çarekerdişo demokratîk ê meseleya kurdî yo.

Amerîka bi nê qerarî wazena ajanîye bikero mîyanê komelê kurdî. Cehd kena ke ajanîye bikero meşrû û komelê kurdî kultur û ehleqê ci ra raqilno. No qerar paştî dano MÎTî  û DAÎŞî rê îmkananê neweyan aferneno. Çunke nê xoverdayoxî vera plananê MÎTê tirkî û DAÎŞî wayîrê rolê esasî yê. Ma tîya ra veng danê pêroyê rayrapêroyîye û bitaybetî zî rayapêroyîya Amerîka û şarê kurdî, no qerar semedê paştdayîşê dewleta tirke û DAÎŞî yo. Ganî şiro Amerîka ser ke wa nê qerarî ra peyser agêro û vera şarê kurdî û herême qirkerdişan mekero.''