Komîteya Şaran û Bawerîyan a KCKyî bi mesajêkî Roşanê Remezanî bimbarek kerd.

Mesaj wina yo:

''Ma Roşanê Remezanî yê pêro alemê Îslamî bimbarek kenê, hêvî kenê ke no roşan bibo wesîleya caardişê azadîye, têdûştîye, haştîye û wayûbiratîya şaran. Ma sere de ê kurdan roşanê ê misilmanan bimbarek kenê ke pêro aşma Remezanî de holîye, raştîye, heq û edalet waşt û bi na bawerîye îbadetê xo kerdê.

Şarê cografyaya muslumanan pê zulm, teda û şîdetê îqtîdar û dewletanê ke xo rê vanê misilman, roşanî pêşwazî kenê. Sere de Rojhelatê Mîyanênî de pêro dinya de mislimanî pê meseleyanê cidîyan kewtî nê roşanî. Cografyaya mislimanan mîyanê meseleyanê ekonomîkan, şeran, polîtîkayanê teda û kolonyalîstan de mende. Ney ra rayîrê xelisîyayîşî no yo ke ganî misilmanî pê mezgêkê demokratîkî bixebitê, xo rêxistin bikerê û têkoşîn bikerê. Xeta demokratîke ya Îslamî zî rejîmanê sîyasîyan ê nikayênan qebul nêkena. Îslam qesr û saltanatanê mezhebperest, nîjadperest û qirkeran ra hîna zaf wayîrê erjanê demokratîkan o û dînêko akerde yo.

Mîyanê şaranê misilmanan de tewr zaf şarê kurdî raştê teda, şer û îşkenceyan yeno. Estbîyayîşê kurdan yeno înkarkerdene, statuyê kurdan nêşinasîyeno û nê zî binê bingeyê qirkerdişanê îqtîdarê AKP-MHPyî. Kurdî wazenê bi wayûbiratîye şaranê bînan de biciwîyê. La hukmatê dewleta tirke û rejîmê tedakarî pê polîtîkayanê talan û şerî cewab danê kurdan. Îqtîdar pê erjanê Îslamî hêrişê kurdan keno û seba ke kurdan çin bikero pêro rayîran ceribneno. Dewleta tirke seba ney  PDK û hêzanê mîyanneteweyîyan de zî îtîfaq kena. PDK pê na hemkarîye hêrişanê bêexlaqan kena. Coka ganî vera na dînperessyîya faşîzm û kolonyalîzmî xeta Îslamê demokratîkî de şer bêro kerdene. Reyna kurdî ganî vera îxanetî zî hîna bi rêxistinî û têkoşînê kolektîfî têbigêrê.

Kurdîstanijê ercîyayeyî;

Dewleta tirke ya kolonyalîste seba ke qirkerdişê kurdan temam bikera her hetî ra hêrişanê xo xorin kena. Seke zanîyeno kolonyalîstan tim no bi hetkarîya xayînan û hêzanê mîyanneteweyîyan kerdo. Emser zî vera Başûr, Şingal, Mexmûr û Rojawanî hêrişan dewam kerd. 17ê nîsane de werteyê Remezanî de dewleta tirke bi armancê qirkerdişî hêrişê Şikefta Birindaran û Koyê Reşî kerd. Vera ney gerîlayan bi xoverdayîşî cewabêko pîl da. Gerîlayî vera hêrişanê îşxalî sey mumînan vindertî û do vinderê. Heta ke gerîlayî delweta tirke bin nêkerê no roşan bi azadî nêno bimbarekkerdene. Sey şarê kurdî ganî şima zî nê têkoşînî temam bikerê, ewladanê xo de mil bi mil binê û her ca de vera zulm, bêedaletî, neheqîye têkoşîn bikerê.

Kurdîstanijê ercîyayeyî yê welatperwerî;

Sey şarê kurdî ma reyna bi xoverdayîşêkî dekewtî nê roşanî. Şarê kurdî rojê rojeyî, mîyanê çalakîyanê demokratîkan de, bi têkoşînî temam kerdî. Bi nê hawayî şarê kurdî bi vengê wijdanan. Şarê kurdî bi nê hawayî bi temsîlkar û serkêşê krîterê 'Îbadeto tewr pîl, vera zulmî xoverdayîş o.' Bi na wesîle ma Roşanê Remezanî yê şarê xo û dostanê xo bimbarek kenê. Ganî ma roşan de şehîdanê xo hîna zaf bîyarê vîrî û wayîrê înan vejîyê. Sere de keyeyê şehîdan ganî ma hîna zaf paştî bidê keyeyanê tepişteyan. Ma zî bi wesîleya roşanî verê şehîdanê xo de bi rêzdarî milê xo anê war, soz danê ke dewaya heqdare ya kurdan bi têkoşînî biresnê serfîrazîye.

Vera Îslamî xirabîya tewr pîlêre na ya ke seba înkar, zulm û bêedaletîye şuxilîyayîşê ci rê bêvengmendiş o. No ne yeno qebulkerdene ne zî yeno efûkerdene. Bi wesîleya nê roşanî ma venga şaranê Rojhelatê Mîyanênî, şaranê misilmanan danê ke vera hêzanê faşîstan, mezhebperestan, îstîsmarkeranê dînî û meraqdaranê qesr û saltanatan pîya vengê xo vejê, pîya têkoşîn bikerê. Bi na mana ma Roşanê Remezanî yê dormeyê misilmananê demokratîkan, terefgîranê yewîya şaran û terefgîranê wayûbiratîya şaran reyna bimbarek kenê.''