Konseya Rayberdişî ya KCKyî bi eşkerayîyêke hêrişê dewleta tirke yê vera sivîlan şermezar kerdî. Eşkerayîye wina ya:

''Dima ke AKP-MHP newe ra bi îqtîdar dewleta tirke ya kolonyalîste û qirkere vera kurdan û hêzanê azadîye hêrişê xo zêdînayî û hewteyanê peyênan de Rojawan û Başûrê Kurdîstanî de hemwelatîyê ma şehîd kerdî. Ma nê hêrişanê dewleta kolonyalîste bi giranî şermezar kenê. Ma keyeyanê nê şehîddan û şarê Kurdîstanî rê serweşîye wazenê.

Vera nê hêriş û qirkerdişan tay welatperwerî û rêxistinê demokratîkî nêrazîbîyayîşê xo mojnenê. La rixmê ke wayîrê mesuldarîye yê, dewlet û rêxistinê mîyanneteweyî bêveng ê. No tewirê bêvengîye nêno qebulkerdene.  Dewleta tirke bi dişmenîya vera kurdan, qet yew sînor, qanûn û huqûqî nêşinasnena û bêmabên hêrişê kurdan kena, kurdan qetil kena. Teyna hewteyanê peyênan de Başûrê Kurdîstanî de bi teyarayanê keşfî xeylêk merdimî ameyî qetilkerdene. La rixmê ney zî ne hukmatê Başûrê Kurdîstanî ne zî dewleta Iraqî qet yew tewir nêgêno. Ganî sere de nê vera nê hêrişan tewirî bigêrê û verê nê qirkerdişan bigêrê. Êyê ke verê qirkerdişê kurdan de bêveng manenê senî xo rê vanê ke kurd ê û şarê kurdî temsîl kenê? No tewir nêno qebulkerdene. Hende hukmatê Başûrê Kurdîstanî rêxistin û partîyê kurdan zî na rewşe ra mesuldar ê û ganî ê zî têbigêrê û tewirê xo bimojnê.

Dewlet û rêxistinê mîyanneteweyî zî ganî vera nê hêrişanê dewleta tirke tewirê xo bimojnê la qetî nêmojnenê. Dewleta tirke her roje hêrişê kurdan kena û kurdan qetil kena. La nê dewletî dewleta tirke reyde seba menfaetanê xo têkilîyanê sîyasî û ekonomîkan virazenê. Şarê kurdî rê muameleya winayêne meşrû nîya û qetî nêna qebulkerdene. Ma reyna venga dewletan û rêxistinanê mîyanneteweyîyan danê ke nê tewirê xo ra fek vera bidê, hemkarê hêriş û qirkerdişanê dewleta tirke nêbê û vera dewleta tirke tewir bigêrê.

Êyê ke hêrişê dewleta tirke teyna sey hêrişanê vera PKKyî mojnenê raştîye nêvanê û qestî ra wina kenê. Nê xayînê ke seba menfaetanê xo hetê dewleta tirke de cagênê bi nê tewirê xo kenê ke xayînîya xo binimnê. Dewleta tirke bi nê hêrişanê xo yê peyênan ê vera Başûrî eşkera kerd ke armancê ci çinkerdişê estbîyayîşê kurdan o. Vera ney ganî welatperwerî, rêxistinê demokratîkî, roşnvîr û hunermendê kurdî bi hawayêkê bihêzî tewirê xo bimojnê, serê sîyasîyan de teda bikerê ke mesuldarîya xo  bîyarê ca. Şarê kurdî û dostê înan zî ganî her ca de tewirê xo bimojnê, bêvengîya dewletan û rêxistinanê mîyanneteweyîyan protesto bikerê û bimojnê ke no tewirê înan nêno qebulkerdene.''