Komîteya Tekîlîyanê Teberî ya KCKyî  bi eşkerayîya nuştekîye veng da ke wa vera hêrişê îşxalî yê dewleta tirke û çeteyanê DAÎŞÎ yê vera herra Başûrê Kurdîstanî û Iraqî nêrazîbîyayîşo xurt bêro kerdene.

Eşkerayîya Komîteya Tekîlîyanê Teberî ya KCKyî  de nê ameyî parekerdene:

''Nê prosesî de ke qewimîyayîşê muhîmî yenê ciwîyayene wezîfeyê ma yo ke zanayîşê raştî bidê şarê xo û rayapêroyîye. Seba ke proses raşt bêro famkerdene û tewiro raşt bêro girewtene no muhîm o. Ma 1ê temmuza 2024î de bale ante eşkerayîya zûre û manîpulasyonî ya Wezîrîya Karanê Zereyî Iraqî ser.

Dewleta tirke ya îşxalkere seba ke kerdişanê xo yê bêehleq û bêhuqûqî binimo her qeyde provokasyonan kena û  xeberanê zûran dana. Sebebê nê derbê giranê ke Gerîlayanê Azadîye yê Kurdîstanî ra girewtî. No xora bîlançoya HPGyî ya menga hezîrane ya 2024î de yeno vînayene. Têna çalakîyanê gerîlayan ê menga hezîrane de 185 çalakîyê gerîlayan ameyî kerdene û 46 îşxlakerî ameyî cezakerdene.

Dewleta tirke ya îşxalkere seba ke vera Gerîlayanê Azadîye yê Kurdîstanî ser nêkewt qoricîyanê dewe û çeteyanê Rojî reyde inkey zî çeteyanê DAÎŞî kewna tewrê şerî. Şarê ma û rayrapêroyîya dinya zana ke Gerîlayanê Azadîye yê Kurdîstanî Hewlêr, Kerkuk, Mexmûr û Şingal de vera çeteyanê DAÎŞî bi hewayêkê fedayîyî şer kerd û bedelê girdî dayî, anorê merdimîye xelisna.  Reyna Rojawan de zî vera çeteyanê DAÎŞî têkoşîno bianor da. Îqtîdaro faşîst ê AKPyî tim eşkera paştî dano çeteyanê DAÎŞî. Çeteyê ke Tirkîya de yenê weyekerdene û rêxistinkerdene Tirkîya ra heta Mokova, Ewropa xeylêk welatan de qirkerdişî kerdî. Dewleta tirke ya îşxalkere ewro heme Başûrê Kurdîstanî de hem zî Rojawan de çeteyanê DAÎŞÎ şuxilnena.

Dewleta tirke Başûrê Kurdîstanî de çeteyanê DAÎŞî ca kena û PDK zî nê rê çimanê xo geno. No şerm o, eyb o. Dewleta tirke çeke, cepxane û hêzê xo kirişena herra Başûrê Kurdîstanî, çeteyanê xo tîya ca kena. PDK vera nê bêveng o. Çîyo winayên nîno qebulkerdene. Nê prosesê muhîmî de ke qewimîyayîşê krîtîkî benê û herême newera yena dîzaynkerdene, seba ke şarê kurdî reyna vîn mekero ganî heme roşnvîr, akademîsyen, rojnameger û her keso demokrat vera rolê hemkarîye û bêoxirî yê PDKyî tewiro qetî bîgêro.

Şarê Îraqî û dewleta Iraqî yê ke zanê vera çeteyanê DAÎŞî Gerîlayanê çAzadîye yê Kurdîstanî ê pawitî ganî vera nê vengê xo berz bikero.Wa rayapêroyîya dinya bizano ke çeteyê DAÎŞî yê ke ewro vera Gerîlayanê Azadîye yê Kurdîstanî şer kenê siba do newera bibê belayê merdimîye. Coka ganî vera îşxalkerdişê herra Başûrê Kurdîstanî  têkoşîno xurt bêro dayene. Ganî şarê ma her ca de bi hewayêkê qerardarî têkoşîn bikero û vera xayînîya PDKyî tewir bîgêro.''