Vervatoxêkê Wezîrîya Karanê Zereyî yê Iraqî derheqê şewatanê ke Kekûk, Hewlêr û Duhok de cayanê merkezîyan hedef genê vat hîrê kesî ameyî tepişene û ê sey endamê PKKyî monayî ra. Eynî eşkerayîye de  ame îdîakerdene ke nînan ra di kesî hêzê asayîşî yê Başûrê Kurdîstanî yê û hetê PKKyî ra ame wezîfedarkerdene.

Komîteya Tekîlîyanê Teberî ya KCKyî eşkerayîya xo de da pêhesnayene ke înan eşkerayîya Wezîrîya Karanê Zereyî yê Iraqî çapenîye ra musayî û vat: ''No raşt nîyo, her kes zano ke no bi destê MÎT-Parastinî ame kerdene û kenê ke nê sûcî bierzê ma ser. Ma nê red kenê.''

Eşkerayîye de nê ameyî vatene: ''PKK heta ewro tim bi têkoşîn, tewirê xo yê qerardarî hetê şaranê Kurdîstanî û Rojhelatê Mîyanênî ra hol yeno naskerdene. Paştê şarî tira pêt a, wina hêzêko ke şar pê ey sereberz o. her cayo ke tede neheqîye û tehdît est o PKK ûca tewirê raştî geno. Ewro zî vera dewleta tirke ya ke game bi game Başûrê Kurdîstanî  û Iraqî îşxal û îlak kena, şerro xurt kena. Leşkerê artêşa tirke bi paştdayîş û îmkananê îdareyê PDKyî Zaxo, Duhok û Hewlêr de vera şarê ma bêhurmetîye kenê, îşxalê xo yê ke mîyan da destpêkerdene eşkera eşkera dana dewamkerdene. Artêşa tirke ya îşxalkere herra Iraqî de saetnê nêmroje de rayîr birnena, bizorî nasnameyan kontrol kena, şarî tepişnena, bi keşîf û hêrişanê topan şarî şehîd kena, bi zorî dana koçbarkerdene.

Artêşa tirke ya îşxalkere her roje nê sûcanê xo rê dewam kena, PDK hemkarîya xo domeneno û hukmatê Sudanî bêveng o.

Vera hêrişê îşxalî yê vera Başûrê Kurdîstanî û Iraqî gerîlayê azadîye yê Kurdîstanî heme îmkananê xo fînenê  dewre û têkoşîn kenê. Rixmo ke vera gerîlayan her qeyde çekanê qedexeyan şuxilnena, her qeyde sûcanê şerî kena, teknolojîyê xo yê averberdeyî şuxilnena dewleta tirke vera gerîlayan bin kewna. Artêşa tirke ya îşxalkere cayê ke îşxal kerdî nêeşkena tira vejîye, têna bi unîformayanê Iraq û PDKyî eşkena  têbigêro.

Têgêrayîşê ma vera hêrişê îşxalî têkoşînê xurtî dano la Wezîrîya Karanê Zereyî yê Iraqî eşkerayîya winayêne dano. Ma şermezar kenê. Gama ke çeteyanê DAÎŞî hêrişê Îraqî kerd têgêrayîşê bi heme hêzê xo semedê pawitişê şarê Iraqî û şarê kurdî têkoşîn kerd. Hemleyanê DAÎŞî ra pakkerdişî yê Hewlêr, Mexmûr, Kerkûk, Şingal û Musul de aktîf ca girewt û bedelê girdî dayî. Nê semedî ra Serekwezîrê Iraqî ma rê spas kerd. Ma wextê hêrişanê DAÎŞî de seba ke  Kerkûk, Hewlêr, Duhok bipawê çîyo ke destê ma ra ame kerd û şehîdî dayî. Inkey îdîa kenê ke bazar û sukê nê bajaran ma vêşnayî. Na îftîraya girde û manîpulasyon o. Ma nê îdîayan wijdanê şarê kurd û Iraqî rê verdene ke  ma verê çimanê ci de têkoşîn kerd.

Têgrayîşê ma ne vera dewleta iraqî ne zî komelê Iraqî yo. Eşkera yo ke na îftîraya MÎT a. Wezîrîya Karanê Zereyî yê Iraqî hetê kamî ra na eşkerayîye daye no zî zelal o. Çimeyê nê îdîayan MÎT û Parastin ê. Ganî dewleta Iraqî û Wezîrîya Karanê Zereyî bi vatişê MÎTî têmegero û sûcdaranê raştan vejo meydan. Reyna ma veng danê şarê demokratîk û xoverdayoxî yê Iraqî ke wa vera nê zûran tewirê xo ramojno, vera vatiş û çalakîyanê ke îşxalkerîya dewleta tirke meşrû kenê têbigêrê.''