Şarê kurdî û cografyaya Kurdîstanî tim bîyî hedefê hêrişan. Kurdan seba ke xo hêrişan ra bipawê serê koyan, kendalan û leweyanê berzan de kelayî viraştî.

Nê kelayan ra yew zî Kelaya Sirûçikî ya Berzencî ya Başûrê Kurdîstanî ya ke nêzanîyeno hetê kamî ra virazîyaya. 

Goreyê tay agahîyan kela 1700 de hetê Erdelanîyan ra virazîyaya û dima zî hetê Babanîyan ra şuxilîyaya.

Kela serê koyêkî de virazîye. Merdim wexto ke teberî ra ewnîyeno nêeşkeno kela bivîno la wexto ke nêzdîyê ci beno kerra û kemerê ci asenê. Verê berê kela de mîyanê kerrayan ra kanîyêke herikîyena. Kela de korîdorêko teng zî est o ke ancax di tenî têkişt tede eşkenê şorê.

Her ke merdim şino kerrayê pîlî asenê. Mîyanê nê kerrayan de sûrê kela xo mojnenê ra. Beşo girîng ê sûranê kela hema zî nêrijîyayo, xo ser de yo.

Zereyê kela de zî tay odayî hema nêrijîyayî. Hîrê hetanê kela de lewe û kendalê berzî est ê.

Nêzanîyeno ke kelaya kahane de çend odayî est bîyê. Labelê goreyê texmînan tede tewr tay 10 odayî est bibî.