Kuçeyêkê Çîmentepe yê Îzmîrî de alayê HDPyî, fotografê Denîze Poyraz, meymanî şinê yenê, keye binê pankarta 'Ma soz dayo Denîze haştîye do bêra' ronişte yo...

Apê Denîze Mahmut Poyraz vano: ''HDP keyeyê Denîze yo. Qirkerdişê denîze kurdan rê bi çeqêk. Înanê ke fermanê mergê Denîze dayo eke bizanayêne hende veng vejîyeno no ferman nêdayêne.''

Xeyma serweşîye qetî veng nêmanena. Masa de tim xeylê kesî ronişte yê. La çew nêbermeno. Her kes bêveng û hêrsbîyaye yo. Kesê ke yenê xeyma serweşîye verî şinê hetê dayîke Fehîme Poyraz.

Dayîke Fehîme vana: ''Ez do nêberma. Mi a morg de zî dîye la ez nêbermaya. Mi zaf çîyî eştî zereyê xo. Key Kurdîstan awan bibo ez do hînî zerrîya xo rehet bikera la nika nê. Wexto ke ez têna manena bena xemgîne. Ez dadî ya. La wexto ke paştdayîş vînena bena bihêzêr. Denîze zaf huyayêne. Ez û wekîle Serpîle (Kemalbay) pîya şîyî morg. Wekîla ma wexto ke Denîze dîye vat 'Ax Denîze tim tim hûyayêne tîya de zî ti ma rê hûyena.' Ma kêfweş ê ke kênaya ma şehîde bîye. Aye ganê xo şarê xo rê feda kerd. A zerrî ra partîye de xebitîyayêne.''

Babîyê Denîze wexto ke Denîze 4 serre qije bîye tepişîyayo. Denîze heta sinifa 4. ya dibistane wenda. Dayîke Fehîme Poyraz neçare mende ke debara keyeyî bikera, Denîze zî ewnîyayêne way û birayanê xo. Dayîke Fehîme vana: ''Denîze muzîkî ra hes kerdêne, govende ra zî labelê xeyalê ci bi ke biba mamostaya kurdkî. Tim waştêne şora Mêrdîn û ders bida. Waştêne ziwanê xo bimusna şarê xo.

Kênaya mi bicoş bîye, her çîyî ra hes kerdêne. Kiştoxî verî gule eşt linga aye Denîze nêeşkaya birema. Denîze heta nefesê xo yê peyênî xo ver da la nêeşkaya. Ma key haştîye wazenê sereyê ma birîyeno. Ez do waştişê haştîye ra fek vera nêda. Ez nika seba kênaya xo têkoşînê haştîye bikera.''

Fehîme Poyraz kênaya xo nêdîye. Saete 9 de wexto ke Denîze keyeyê xo ra vejîyaye babî Abdulîllah Poyraz ci rê vano 'Ez zî to reyde bêra.' La Denîze qebul nêkena. Wexto ke keyeyî ra vejîyaye ewnîyena babîyê xo û hûyena. Babî Poyraz vano: ''Seke çîyêk zerrîya mi ra qerifîya. Mi nêwaşt têna şora la berî ra vejîyaye û şîye.''