Encamnameyê  Dîwanê Kongreya 12. ya PKKyî wina yo:

''Kongreya ma 12ine ya ke bi vendayîşê Rayber Abdullah Ocalanî yê 27ê sibate mabênê tarîxanê 5-7 gunale de ameye kerdene, bi serkewtişî qedîya.

Kongreya şertanê zoran de ke erdî û hewayî ra hêrişî, ablûqaya vera waranê ma û ambargoyê PDKyî dewam keno, bi asayîşî ame kerdene. Bi sebebê asayîşî bi hewayêkê hemwextî di waranê cîya cîyayan de ameye kerdene. Kongreya ke bi tewrbîyayîşê 232 delegeyan ameye kerdene badê munaqeşeyanê babetanê cîya cîyan qerarê tarîxîyî ameyî girewtene ke semedê têgêrayîşê ma yê azadîye dewrêkê neweyî îfade kenê.

Xebatê ke bi nameyê PKKyî yenê rayraberdene ameyî peynîkerdene

Kongreya ma ya 12ine de ame erjnayene ke têkoşînê PKKyî sîyasetê înkar û îmhayî yê serê şarê  şikit, meseleya kurdan ard nuqtayêke ke hinî bi rayîrê sîyasetê demokratîkî eşkena bêro çareserkerdene, nê hetî ra PKKyî mîsyonê xo yo tarîxî ard ca. Na çarçewe de Kongreya 12ine ya PKKyî bi waştişê prosesê pratîkbîyayîşî hetê Rayber Apoyî ra bêro îdarekerdene û rayraberdene qerarê feskerdişê awanîya rêxistinkî ya PKKyî û peynîkerdişê têkoşînê çekdarî girewt û xebatê ke bi nameyê PKKyî yenê kerdene peynî kerdî.

Partîya PKK; vera sîyasetê înkar û îmhayî yê vera kurdan ke çimeyê ci Pêkerdişê Lozanî Qanûnê 1924î yo sey têkoşînê azadîye yê şarê vejîya sehneyê tarîxî. Seba ke şarê kurdî bieşko qederê xo bi xo tayîn bikero bingeyê stratejîya têkoşînê çekdarî de têkoşînêko meşrû û heqdar rayra berd. PKKyî wextê polîtîkayanê înkar û sîyasetê qirkerdiş û asîmîlasyonî yê vera kurdan de şekl girewt.  Têkoşînê xo yê azadîye ke 1978î ra nara rayra beno tim waşt ke estbîyayîşê kurdan bêro qebulkerdene, meseleya kurdan sey realîteya esasî ya Tirkîya bêr o vînayene. Na çarçewe de têkoşîno ke bi serkewtişî rayra berd bi nameyê şarê ma şorişê ganîbîyayîşî ard ca û bi sembolê hêvîya azadîye û cuya bianore ya şaranê herême.

Serranê 1990yan de ke şorişê ma yê ganîbîyayîşî semedê şarê ma averberdişê muhîmî aver berdî Serekkomarê Tirkîya Turgut Ozalî waşt meseleya kurdan bi rayîrê sîyasetî bêro çareserkerdene. Rayber Apoyî 17ê adara 1993yî de bi qerarê adirbirnayîşî cewab da û prosesêko newe da destpêkerdene. La bi tesîrê sosyalîzmê reelî, zîhnîyetê çetewarî yê vera xeta ma ya şerî û seba ke  dewleta xorî Turgut Ozal werte ra wedarit no proses sabote bi. Bi hezaran dewî ameyî vengkerdene. Bi mîlyonan kurdî erdê xo ra ameyî kerdene, bi des hezaran kesî raştê îşkenceyan ameyî û zîndanan de ameyî cakerdene. Bi hezaran kesî sey kiştoxê ci meçhul ê ameyî ameyî qetilkerdene. Vera nê Têgêrayîşê Azadîye her hetî ra xurt bi, şerê gerîlayan Kurdîstan û Tirkîya ra vila bi. Bi têsîrê şerê gerîlayan şarê kurdî wirişt payan ser serhildanî kerdî. Wina qeyde semedê wird hetan zî şer bi vîjnayîş bingeyî. Waştişê çareserîya bi rayîrê demokratîkî yê Rayber Apoyî netîce nêgirewt.

Gerek têkîlîya kurdan-tirkan newe ra bêro serûberkerdene

Proses bi komployê mîyanneteweyîyî yê 15ê sibata 1999î kirişîya merhaleyêka bîne. Nê prosesî de şerê kurdan-tirkan ke hedefê komployî bi, bi fedakarîya Rayber Apoyî ame astenkerdene. Rixmê sîstemê îşkence û qirkerdişî yê Îmraliyî semedê çaserkerdişê meseleya kurdan a bi rayîranê demokratîkî, kerd xo çeng. Rayber Apoyo ke 27 serrî yo binê tecrîdê giranî de yo bi têkoşînî komplo betal kerd û semedê şarê ma, cinîyan û merdimîya bindeste sîstemê azadîye ya alternatîfe teqdîm kerd.

Dîyalektê tekîlîya tarîxî ya kurda-tirkan ya 1000 serran û têkoşînê 50 serran ê Rayberîye mojna ke têna eke meseleya kurdan bingeyê Welato Hempar û Hemwelatîya Seyyewbînîye de bêro çareserkerdene dano qezeckerdene.  Çarçeweaya Şerê Dinya yê Hîrêyinî de averşîyayîşê Rojhelatê Mîyanênî zî mojnenê ke gerek têkîlîya kurdan-tirkan newe ra bêro serûberkerdene.

Şarê ma do nê qerarî her kesî ra zafêr fam bikero

Şarê ma bianoro ke 52 serrî yo bi bedelanê girdan vera poltîkayanê qirkerdiş û asîmîlasyonî tewrê rayraşîyayîşê Rayberîye û PKKyî beno, do wayîrê prosesê komelê demokratîkî bivejîyo. Şarê ma do gerarê feskerdişê PKKyî û qedînayîşê metodê têkoşînê çekdarî her kesî ra zafêr hol fam bikero, têkoşînê înşayê komelê demokratîkî de wezîfeyanê xo bîyaro ca. Zaf muhîm o ke serkêşîya cinîyan û ciwanan de bi ruhê seferberîye semedê înşayê komelê demokratîkî yê komunalî têkoşîn bêro kerdene. Na çarçewe de ma pê bawer ê ke partîyê sîyasîyî yê kurdan, rêxistinê demokratîkî, rîsipîyî do berpirsîyarîya xo bîyarê ca.

Wa her kes tewrê prosesê komelê demokratîkî bibo

Qerarê kongreya ma yê feskerdişê PKKyî û qedînayîşê têkoşînê çekdarî do verê haştîye û çareserîya demokratîke abikero. Seba ke nê qerarî bêrê caardene gerek Rayber Apo proses rayra bero, ci rê heqê sîyasetê demoratîkî bêro naskerdene û bi gamanê huqûqî yê pêtan no bigîro binê asayîşî. Nê hetî ra meclîsê Tirkîya gerek rolê xo yê tarîxî kay bikero. Eynî qeyde sere de hukmat û partîya muxalefetî ya esasî ma veng danê  heme partîyanê sîyasîyan, rêxistinanê sîvîlan, komelanê dîn û bawerîye, dezgehanê çapemenîya azade, rîsîpîyan, roşnvîran,akademîsyenan, hunermendan, sendîkayanê karker-kedkaran, rêxistinaê ciwan-cinîyan, têgêrayîşanê ekolojîstan ke wa prosesê komelê demokratîkî de berpirsîyarîya xo bîyarê ca.

Na çarçewe de serê dostê ma yê ke Hemleya Azadîye  ya Globale rê serkêşîye kenê ma veng danê danê rayrapêroyîya demokratîke ke wa paştdayîşê enternasyonalî xurt bikerê. Ma veng danê hêzanê mîyanneteweyîyî ke wa vera polîtîkaya qirkerdişî ya vera şarê ma berpirsîyarîya xo bîyarî ca, verê çareserîya demokratîke de asteng nêbê û paştî bidê prosesî.

Ma şehadetê hemrayanê xo Ali Haydar Kaytan û Riza Altunî îlan kenê

Kongereya ma şehadetê kadroyanê reyberan ê PKKyî ra Ali Haydar Kaytan (Fuat Ali) yo ke 3ê temmuza 2018î de şehîd bi,  Riza Altun o ke 25ê êlula 2019î de şehîd bi, îlan kena. Na çarçewe de hemra Ali Haydar Kaytan sey sembolê 'Pabestîya Rayberîye, Heqîqet û Cuya Bimbareke', Hemra Riza Altun o ke embazanê rayîrî yê verênan ê Rayber Apoyî ra yew o, sey sembolê 'Herayîya Azadîye' qebul kena.

Ma kongreya xo yê 12ine nê dîyarîya nê wird hemrayanê xo kenê ke destpêkerdişê Têgêrayîşê Azadîye ra nata bi têkoşînê bêmabênî ma rê serkêşîye kerde. Ma şexsê înan de reyna sozê serkewtişî danê heme şehîdanê xo yê têkoşînî. Ma reyna vanê ke ma do xîyalanê Şehîdê Haştîye û Demokrasîyî Sirri Sureyya Onderî bîyarê ca.

Sosyalîzmê netewa dewletdare bin fîneno; Sosyalîzmê komelê demokratîkî ser fîneno‘

Israrê seba merdimîye israrê seba sosyalîzmî yo!

Bijî Serok Apo!''