Emîne Şenyaşara ke mêrde û lajê ci hetê pawitox û merdimanê Wekîlê AKPyî Halîl Îbrahîm Yildizî ra ameyî qetilkerdene lajê xo Ferît Şenyaşarî reyde verê Edlîyeya Riha de çalakîya nobeta edaletî rê dewam kena. Çalakîya keyeyê Şenyaşarî roja 32. de ya.

Ferît Şenyaşarî verê edlîye de qisey kerd û pare kerd ke ê têkoşînê xo de qerardar ê û vat: ''Ma her roje mabênê 08.00 û 17.00 de verê Edlîyeya Riha de nobete de yê. Kesê ke wazenê ma zîyaret bikerê wa bêrê, bibê vengê têkoşînê ma. Ma bawerîya xo ya seba edaletî hema vînî nêkerde, edalet rojêke do bêra''
Keyeyî hesabê xo yê medyaya komelkî de da zanayene ke Weqfa Heqanê Merdiman a Tirkîya (TÎHV) ê zîyaret kerdî û înan rê sipas kerd.