Ganî merdimê ke şorê herêmanê Başûrî yê îşxalkerdeyan bi qerardarî qalê îşxalî bikerê.

Bi taybetî noqtayê ke binê kontrolê MÎT û Parastinî de yê nînan ra derbazkerdiş rîskê pîlî yê. Rojnamegerê sey Silêman Ehmedî seba ke sînorî ra derbaz benê yenê remnayene. Ma sey rojnamegeran bi dîqatî kenê ke şorê herême. Xeberê ke herême ra yenê seba ke rîyê PDKyî yê raştikênî eşkera kenê girîng ê. Coka zaf tedbîrî yenê girewtene. Înternet nê herêman de zaf giran o, rayîrî birîyenê û çimeyê têkilîye yenê sînorkerdene.

Nê çîyî seba ke hêrişê qirkerdişî nêrê zanayene yenê kerdene.

Nê çimadarîyê ma yê verênî yê. Seba keyanê ke ameyê vêşnayene meseleya resayî est a. Seba ke guzergehî hetê teyarayanê şerî ra dîyenê bombayan ver bi wesayîtî derbazkerdiş mumkîn nîyo. Şima mecbur paye şorê la rayîran de çalê ke bombayê tirkan akerdê est ê.

Nê rayîrî seba ke wextê sewqîyatanê leşkerîyan de gerîlayî çalakîyanê sabotajî nêkerê dîyenê bombayan ver. Seba ke şar nêeşkeno nê rayîran ra derbaz bibo û şoro baxçeyanê xo pêro berhemê înan ê baxçeyan puyenê. Ancî bi îhtîmal o ke seba ke gerîlayî nê baxçeyan ra fayde nêgêrê baxçeyî yenê vêşnayene.

Ma neçare manenê ke dormeyê rayîran ra şorê. Rayîrê sivîlan hinî rayîrê leşkeran ê. Tîya de beno ke şima bêrê qetilkerdene. Wina vajîyeno ke eke şar nê rayîran ra şoro û çîyêk bêro sereyê ci mesuldarîye hinî yê şarî yo. Şaro ke tîya ra şono hetê MÎT û Parastinî ra yeno tehdîtkerdene.

Temamîya roje de tirê sewqîyatê leşkeran û malzemeyan rayîran ra derbaz benê. Şewatan ra herême ser ra dû berz beno. Destûr nêdîyeno ke şar şewatî hewna bikero. 

Tay cayan ra dûyo sipî berz benı. Ma fam kenê ke nê dûyî dûyê çekanê kîmyewîyan ê fosforin ê ke Herêmanê Pawitişî yê Medya de vera gerîlayan şuxilîyenê. Nê gazê fosforinî qedexe yê. La seba ke tîya de babete cografyaya Kurdîstanî ya çew ney rê vengê xo nêkeno. 

Ma dûyî ra nêeşkenê nefesî bigêrê. Rengê herre vurîyayo û gandarî nê gazî ra  merdê. Darî dûyê jehrînî ra wişk bîyê. 

Nê cayan de mengêke verê co bi des heszaran merdimî ciwîyayêne. La teşxeleyê 'qefilnayîşê kilîdî yê dewleta tirke ra PDKyî mengêke de dewî xalî kerdî. 

Başûr de tehamulê dewleta tirke yê bi vengêkê qijî zî çin a. Çunke beno ke peyê darêke de gerîlayî est bê, gerîlayî çimeyan rê awe şimenê. Dewleta tirke bi bahaneya gerîlayan erazîyanê pîlan dana adirî ver. 

Cogrfayaya Kurdîstanî binê tehlukeyê çinkerdişî de ya. Êyê ke verê ney de bêveng ê ameyoxê xo vêşnenê. Cografyaya Kurdîstanî ya ke bi erjanê têkoşînî yê pîlan ameya afernayene, hendê bi qîmet a ke nêbeno merdim aye xayînan û îşxalê dewleta tirke rê verbido. Gerîlayî isrardar ê ke bi ganê xo na cografya bipawê coka her roje şehîdan danê.