Koordînasyonê KJKyî bi wesîleya serrgêra 39. ya Hemleya 15ê Tebaxe eşkerayîyêke daye. Eşkerayîye wina ya:

''Ma serrgêra 39. ya Roşanê Gandarbîyayîşî yê 15ê Tebaxe sere de Rayber Apoyî, şarê ma, pêro têkoşeran û cinîyan rê fîraz kenê. Şexsê Fermandarê Efsanewîy Egîd (Mahsûm Korkmaz) de ma pêro şehîdanê xo bi minet û rêzî yad kenê.

Rayber Apoyî hema destpêk de tesbît kerd ke şarê kurdî ancax pê têkoşînêkê çekdarî xelisîyeno. 39 serrî verî bi nê hawayî vera faşîzm û kolonyalîzmê dewleta tirke guleyo verên erzîya. Ewro no gule çar parçeyê Kurdîstanî de bîyo hêvîya şaran û hêzê newe ra awankerdişî. Ewro seba ke ey kurdê azadî, cinîya azade û merdimê azadî afernayî vera Rayber Apoyî hende hêrs est o û o yeno tecrîdkerdene. Coka ganî ma serra 39. de hîna bi hêzêrî û bi ruhê Fermandar Egîdî têkoşînê vera dewleta tirke pîl bikerê û Rayberê xo azad bikerê.

Hemleya 15ê Tebaxe seba pêro cinîyan zî bîya hêvî, kerd ke cinîyî bi hêzê xo tewrê têkoşînî bibê. Cinîyan bi têkoşînê gerîlayan xo newe ra aferna, mîyanê têkoşînê çekdarî de zîncîrê koletîye parçe kerdî û cewabêko manadar dayo serdestîya feodale û sîstemê camêrdan. Xeta ma ya azadîya cinîyan pê gerîlayan ê cinîyan aver şîye, bîye artêşa cinîyan û dima zî pêro cinîyanê dinya rê bîye îlham. Artêşa cinîyan YJA-Star ewro Zap, Metîna û Avaşîn de û her cayê Kurdîstanî de, bi ruhê Egîd û Hemleya 15ê Tebaxe serkêşîya xoverdayîşî kenê. 

Dişmenî kerd ke Hemleya 15ê Tebaxe sey 'çalakîya çend kesan' lanse bikero la wextê Darbeya 12ê Êlule de Hemleya 15ê Tebaxe şarê kurdî û pêro şorişgêranê demokratan rê bîye hêvî.

Ewro ruho ke embaz Egîdî Hemleya 15ê Tebaxe de afernayo, koyan de şer keno. Hemleya 15ê Tebaxe teyna manaya leşkerîye de ney hetê fikrî, kulturelî ra zî şarê kurdî resna cewherê xo. No ruh ewro Garzan de bi Rêdûr û Ardemî, Mêrdîn de bi Zana û Xebatî, Zap de bi Helbeste û Bazî, Avaşîn de bi Andok û Sarya dewam keno. Hemleya 15ê Tebaxe kulturêk aferna ke no kultur rayîr nêdano faşîzmî.

Ma reyna şehîdanê xo yê qehremanan yad kenê û soz danê ke cuyêka rûmetêne û azadeya ke oxirê ci de înan ganê xo dayo, awan bikerê.  Ma sere de cinî û ciwanî venga pêro şarê ma danê ke bi ruhê Fermandar Egîdî, bi perwerîya nê ewladanê fedayîyan bi xurtêr û hêzêrî tewrê serra 40. ya Roşanê Gandarbîyayîşî bibê, paradîgmaya demokratîke, ekolojîke û azadîgîra cinîyan aver berê û têkoşînê ma yê rûmetênî bi serkewtişî tacîdar bikerê.''