Koordînasyonê KJKyî derheqê hêrişanê îşxalî yê vera Zap, Avaşîn û Metîna de eşkerayîyêke daye.

Eşkerayîye wina ya:

''Hêrişê îşxalî yê dewleta tirke ya faşîste yê vera Metîna, Avaşîn û Zapî sey dewamê konseptêkî kewtî dewre. Nê hêrişê ke serrgêra Qirkerdişê Armenîyan de dîyayî destpêkerdene, eşkera yo ke seba qirkerdişê kurdan, têgêrayîşê ma yê azadîye û şaranê xoverdayoxan xîretêk o. Nê îşxalî yê dewleta tirke parçeyêkê Planê Çinkerdişî yê 2014î yê.

Ma verî gerîlayanê HPG û YJA-Starî pê coşî selam kenê ke 23ê nîsane ra nata vera hêrişanê îşxalî tê artêşa tirke ya îşxalkere pê ruhê fedayî xo ver danê. Gerîlayê Kurdîstanî pê ruhê Garê Avaşîn, Metîna û Zap de xo ver danê û cewab danê hêrişan.

Nê hêrişê ke pê paştdayîşê hêzanê mîyanneteweyîyan yenê kerdene, bêpaştdayîşê Amerîka û tay hêzan nêeşkayêne bêrê kerdene.

Îdareyê neweyî yê Amerîka 100 rojan ra dima selahîyetdaranê dewleta tirke reyde pêvînayîş kerd û cade nê hêrişê îşxalî dayî destpêkerdene. No zî mojneno ke Amerîka şirîka çinkerdişê têgêrayîşê azadîye yê kurdan a. Amerîka qirkerdişê Armenîyan  şinasna la xo qirkerdişê kurdan ra dûrî nêgirewt.

Amerîka reyna îdarekarê PKKyî vistî mîyanê 'lîsteya terorî' û bi nê hawayî xeta ajanîye-bêbextîye de kurda rê bêrûmetîye ferz kerde. Ney zî verê Tirkîya akerd ke vera PKKyî operasyonê çinkerdişî bikera û kurdan qir bikera.

Na bire ganî ne hetê şarê Amerîka ra ne zî hetê rayaumûmîye ra bêra qebulkerdene. Têgêrayîşê Azadîye yê Kurdan şarê Rojhelatê Mîyanênî û Ewropa DAÎŞî ra pawitî, pê hezaran şehîdan têkoşîn kerd. Coka ganî vera nê biran û kerdişanê şaşan tewirêk bêro mojnayene. Pênaseyê PKKyî pê lîsteya terorî yeno manaya pênaseyê şarêkî bi terorîzmî yo. PKK seba neteweya demokratîke û şarê azadî têkoşîn keno, eleqeyê ci pê terorîzmî çin o. Nê hêzê mîyanneteweyî naye zanenê. Ferzkerdişê qirkerdişî yê serê PKKyî yeno manaya ferzkerdişê qirkerdişî yê kurdan. Sere de cinîyî wa şarê ma vera ney xo ver bidê û plan û bira qirkerdişî qebul nêkerê.

Dewleta tirke dewrê tewr zehmetî yê tarîxê xo de ya. Wextê tewr krîtîkî de ya. Kerdiş û hîşmendîya faşîste ya dewleta tirke pêro dinya rê bîyî bela. Hêz û gerîlayê azadîye pê îrade, moral û rûmetêkê pîlî heta peyênî xo ver danê. Têgêrayîş û gerîlayê ma pê hîşmendîya tarîxî heta peyêne do xo ver bidê, welatê xo bipawê, dişmen erdê îşxalkerdeyî ra vejê. Îrade, bawerî û moralê gerîlayan xazîneyo tewr pîl o. Kes do nêeşko nê xezîneyî bi rehetî îşxal bikero.

Coka hêrişê îşxalî yê dewleta tirke yê vera Herêmanê Pawitişî yê Medya ganî hetê kurdan ra sey xeta sûre bêrê dîyene û asta tewr berze de vera hêrişan nêrazîbîyayîş bêro mojnayene. Çunke gerîlayî hêzê caardişê azadîya kurdan, hêvîya ameyoxî yê. Naye ra ganî bi her hawayî fedakarîye bêra kerdene. Gerîlayî, şar û cinîyê ke bi na bawerî û qerardarîye xo ver danê do ser bikewê.

Cinîyê kurdî ganî vera îşxalan pê hîşmendî, cesaretî û qerardarîya pawitişê Kurdîstanê azadî, Rayberê azadî û cinîya azade pê ruhê serferberîye têbigêrê û her ca de vera îşxalan wurzê payan ser.''