Koordînasyonê KJKyî da zanayene ke Endama Konseya Rayberdişî Leyla Agirî (Fîlîze Aslan) hêrişê hewayî yê vera Herêmanê Pawitişî yê Medya de menga hezîrane de şehîd bîye.

Eşkerayîya Koordînasyonê KJKyî wina ya:

''Cinîyê kurdî îdîa kenê ke seserra 21. bikerê seserra azadî, têdûştî û erjanê exlaqî û wijdanîyan. Bi nê hawayî bi qerardarî têkoşînê xo anê ca. Şorişê Kurdîstanî şorişê cinîyan o. Qet yew şoriş de cinîyî wina zêdêr tewrê têkoşînî nêbibî. Şorişê Kurdîstanî, şorişê cinîyan mojna ke modernîteya kapîtalîste ra ber dinyayêka bîne mumkîn a. Armanco verên ê ê hêrişanê ke vera Rayberîya ma, PKK, cinîyanê ma, şarê ma yenê kerdene, no yo ke têgêrayîşê ma merdiman sîstemê serdestî ra dûrî gêno.

Têgêrayîşê Azadîya Cinîyan ê Kurdîstanî bi Sakîna Cansizan dest pêkerd bi Zekîye, Bêrîtane, Zîlane, Sema, Vîyane, Şîrîn Elemhulî, Arîne Mîrkanî û tewr peyên zî Heftanîn de Esmer, Zelale, Nûcan û Dogayî  afernayî. Şehîdê ma yê cinîyî şehîdê afernayoxê Kurdîstanê azadî yê.

Ma temsîlakara çêre ya xoverdayîşê ma embaze Leyla Agirî (Fîlîze Aslan) hezîrana 2020î de hêrişêkê hewayî yê vera Herêmanê Pawitişî yê Medya de şehîd daye. Ma sere de keye û merdimanê ci rê  şarê ma û cinîyanê ma rê serweşîye wazenê. Nameyê têgêrayîşê cinîyan ê kurdan ser o ma soz danê ke bi perwerîya vîrameyîşê embaza ma ya raybere Leyla Agirî ma do Kurdîstanê azadî awan bikerê.

Embaze Leyla Agirî serra 1973î de qezaya Qelqelî ya Wanî de dadîya xo ra bîye. Dima ke lîse qedîna serra 1993î de tewrê gerîlayan bîye. O çax aye xo rê nameyê Leyla Qasim kerd pa. Dima ke şîye Rayberîye û Rayber şinasnayî hîşmendî û îradeyê aye bîyî xurtêr û bîye wayîra wesfanê rayberîye.

Nîsana 1996î de aye perwerîya xo ya seba Rayberîye wina mojnaye: 'Serekê mi ez têna wazena ke biba layîqa ked û xîretanê Rayberîye, vera kede hûrmetdar biba û na çarçewe de şer bikera.' Embaze Leyla binê pêro zor û zehmetîyan de zî na perwerîye arde ca. Embaze Leyla vatêne 'Ma Rayberîye ra musayî ke dej û zehmetîyan bi xurtî pêşwazî bikerê. Ganî merdimî her dej bivurnê hamleyêka xurte, qesasê pîlî û her ca bikerê warê xoverdayîşî. Reng û cayê xoverdayîşî vurîyenê la  xoverdayîş sey her wextî bi îtîşamî dewam keno. '

Cinîya azade û wayîra îdîa senî bena? Têkilîya xurte ya embazîye senî bena? Embaze Leyla tim nê çitan ser o fikîrîyayêne. A bîye rayberanê tewr serkewte û bitesîran ra yew. Embaze Leyla sey yew cinîye tim xo perwerde kerd. Bîye wayîra zanayîşê entelektuelî, îradeyê caardiş û rayberdişê wezîfeyî. Embaze Leyla seba ke ciwanî aver şorê, bibê wayîrê îradeyêkî tim xîret kerd û bi hawayêkê perwerdekarî nêzdîyê ciwanan bîye.

Embaze Leyla xebatanê leşkerî, îdeolojîk, komelkîyan ê têgêrayîşî de asta îdareyî de ca girewt. Gerîla de sey fermandar û perwerdekar, xebatanê komelkîyan  de zî seba averşîyayîşê sîstemî bîye rayber. Dima ke warê Rayberîye de perwerdeyê xo safî kerd bi serran fermandarîya gerîlayan, konseya îdareyî ya YJA-Starî, xebatanê Jinelojî yê PAJKî, xebatanê koordînasyonî yê YJA û KJKyî de wezîfe kerd.

Embaze Leyla Agirî her wezîfeyê xo bi cîdîyet û mesuldarîye ard ca û îdare kerd. Bi nê hawayî zî temsîlkarîya cinîya azade û têgêrayîşî kerde. Her parçeyê Kurdîstanî de bi xîretêkê pîlî xebitîya û seba yewîya cinîyan kede daye. Seba nê tewirê xo her ca de bîye mazharê heskerdişî.

Embaze Leyla Agirî seba ke cinîyî bi krîteranê Konfederalîzmê Demokratîkî xo rêxistin bikerê wayîrê xeylêk wesfan bîye. Aye kesayetê xo de krîterê cinîya azade û newîye afernayî û rolê cinîya raybere bi xîret û azîmî ardî ca. Aye bawer kerdêne ke pêro cinîyî eşkenê cuya azade awan bikerê, bi xopawitişî xo rêxistin bikerê. Embaze Leyla her warê cuye de rayberîye kerde, fedakarîya xo mojnaye.

Kênaya xedare ya Serhedî, aşiqa koyan Leyla Agirî pêro cuya xo de xoverdayîş, welatperwerî û azadî xo rê kerdî esas. Cuya xo ya gerîlatîye ya 27 serran de kesayetê Rayber Apoyî esas girewt. Bîye rîyê têkoşînê bêhampayî yê cinîyan.

Embaze Leyla Agirî xeta xoverdayîşî ya cinîyan bi hawayêkê aktîfî aver berde. Bi hawayêkê serkewteyî rayberîya têkoşînê cinîyan temsîl kerd.

Sayê cinîyanê kedkaran ê sey embaze Leyla Agirî şarê ma û cinîyanê kurdan bi kedanê pîlan, bi xoverdayîşî dewaya azadîye afernaye. Ewro xoverdayîşê cinîyan ê kurdan hêvî dano pêro cinîyanê dinya.

Nê esasî ser o ma reyna şexsê embaze Leyla Agirî de soz danê ke ma ê cinîyan, şaran û bawerîyan reyde ke pê xeta Rayber Apoyî bawer kenê, rayîrê azadîye ser o pîya bi qerardarî û çêrî şorê. Ma do rayberîya cinîyan ê birêxistinan ê Rojhelatê Mîyanênî de dina û Rojhelatê Mîyanênê azad û demokratîkî awan bikerê. Ma do qetî ser bikewê û nê erdî  bi rûmet û azadî biafernê.''