Hêrişê dewleta tirke yê vera multecîyanê Vakurê Kurdîstanî emser zêdîyayî. Êlula 2021î de koçbero sîyasî Ferhat Başkondu suîkastê dewleta tirke de bi giranî birîndar bi. Mehmet Zekî Çelebî 17ê nîsane de Silêmanî de ame kiştene.

Dîmen û qiseyanê şahîdan ra eşkera bi ke kiştoxê Çelebîyî xo Hewlêr de nimnenê. Hukmatê Başûrê Kurdîstanî derheqê nê suîkastan de eşkerayîyêke nêdaye. Seba ke kiştoxê Çelebîyî bêrê muhakemekerdene multecîyanê Vakurê Kurdîstanî hewteyê verênî de verê Ofîsê NYyî yê Silêmanî de çalakîye kerdbî.

Multecîyanê sîyasîyan no hewte zî heyetêkê berzî yê NYyî de pêvînayîş kerd ke Bexdadî ra ameyî Silêmanî.

Pêvînayîş de Ferhat Başkondu, cinîya Çelebîyî Nurtene Çelebî û îdarekarê Komeleya Karkeranê Mezopotamya Musa Çîftçî û Meşrûk Çîftçî est bîyî. Komele da zanayene ke pêvînayîş hol ravêrt û selahîyetdaranê NYyî soz da ke ê cigêrayîşanê serê hêrişan nêzdî ra teqîb bikerê.

Goreyê agahîyan selahîyetdarê Neteweyanê Yewbîyayeyan û koçberê Vakurî do pêvînayîşan rê dewam bikerê.