Kombîyayîşê Meclîsê Başûrê Kurdistanî ame peydeeştene

Roniştişê Meclîsê Başûrê Kurdistanî rîyê krîzê sîyasîyî yê mabênê YNK û PDK’yî de ame peydeeştene.

Ameyêne pawitene Meclîsê Başûrê Kurdistanî seba weçînitişê serekê Meclîsî û hetkaranê ci, ewro saet 11 de bêro pêser. Labelê rîyê krîzê sîyasîyî yê mabênê YNK û PDK’yî ra nêvirazîya. Ame zanayene ke roniştiş heta saet 19’î ameyo peydeeştene. Labelê zelal nêyo ke do roniştiş saet 19 de virazîyo yan nê. Çunke YNK’yî dabi zanayene ke PDK’yî bê hayîya înan Têgêrayîşê Goranî dir serê awankerdişê hukmatê neweyî de pê kerdo û na yewe ra seba ke razînêbîyayîşê xo ramojnê do tewrê roniştişê meclîsî nêbê.

Wekîlê PDK’yî Hêvîdar Ahmedî vat, “YNK tewrê ci nêbo zî meclîs do ewro saeta ke ameya tespîtkerdene de do bêro pêser. Bê YNK’yî hemeyê partîyan do tewrê ci bibê.” La çîyo ke Ahmedî vat bica nêame.    

Yeno vatene, Têgêrayîşê Goranî waştı roniştişê meclîsî bêro peydeeştene.

Serekê demkî yê meclîsî Revîng Hîrorî do serekîye roniştişî rê bikero. Hîrorîyî seba roniştişê destpêkî yê meclîsî yê ewroyî, hewteyê verî hemeyê partîyan dir pêvînayîş kerdibi.

Goreyê pêkerdişê hetan, wezîfeyê Serekîya Meclîsê Kurdistanî do bidîyo YNK’yî, hetkarêk do PDK’yî ra bo û hetkarêk zî Tirkmenan ra bo.

NAMEYÊ FAYÎQÎ YENO VATENE

Pîya bi krîzê sîyasî û xîlafanê zereyênan zî seba serekîya Meclîsî nameyê Rawez Fayîqî yeno vatene.

Têgêrayîşê Nişfê Nû (Azo Newe) ke meclîsî de 8 wekîlê ci estê vat ke do tewrê hukmatî nêbo, da zanayene ke do tewrê roniştişê ewroyî bibo û seba serekîya Meclîsî namzed ramojno.