Komîteya Xebatanê Şehîdan a PKK'yî Bêrîtane (Gulnaz Karataşe) û şehîdê menga Teşrîna Verêne yad kerdî.

Eşkerayîya Komîteya Xebatanê Şehîdan a PKK'yî wina ya:
 

"Têkoşînê azadîye yo ke Kurdistan de yeno dayene tarîxî ra derbas bîyo, bi bedelan xo resnayo roja ma ya ewroyêne. Her prosesê tarîxî de bi hezaran şehîdî ameyî dayene. La derbê pîlî sîstemê îşxalkarî ro ameyî dayene. Şarê Kurdî yo ke estbîyayîşê xo bibîyayêne babeta munaqeşeyanê meşrûkerdişî yê sîstemê îşxalkarî û qirkerî bi têkoşînê rayberîya PKK'yî kewto verê rayîrê azadîye, estbîyayîşê xo pêroyê dinya rê mojna. PKK'yî xîret û komloyê verba Kurdêko azad çin pûç kerdî ke ma ewro verê xo dayî ci.

Menga Teşrîna Verêne têkoşînê azadîya Kurdistanî de wayîrê girîngîyêka pîle ya. Wexto ke 25'ê Teşrîna Verêne de ame waştene ke xeta Rayber Abdullah Ocalanî bêra tasfîyekerdene û  PKK zî xeta azadîye û serfîrazîye ra bêro raqilnayene, embaze Bêrîtane sey cinîyêka azade bîye ruh û girêdayîşê xeta cuyêka azade. Bîye nîşana pawitişî û wayîrvejîyayîşê rastîya Rayber Abdullah Ocalanî. Verba xizimkarîye û xulamtîya dişmenî rê bîye daşinasnayîşê welatperestîye. Ewro çar parçeyanÊ Kurdistanî de cinîyê Kurdî rayîrê embaze Bêrîtane taqîb kenê, rayberîya şorişî kenê, pêroyê dinya rê benê hêvîye. Rojawan de verba faşîzmê Erdoganî û Bahçelîyî, pêroyê Kurdistanî de verba Kurdo xizimkarî Bêrîtanan ganî kenê.

Bêguman serra 2019 de zî tehdît û tedayê serê Kurdistanî û Kurdî ganî yê. Rastîya dewleta Tirkî ya îşxalkare û qrikerdişî dewam kena. Hêrişê ke Îmrali de verba Rayber Abdullah Ocalanî rê yenê kerdene, Vakur, Başûr, Rojakewtene û Rojawan de tesîrê xo mojnenê. Dewleta Tirkî wazena her ca de îradeyê Kurdî bişikna. Naye ra îşxalkarîya xo xurtêr û herayêr kerde. Dewleta Tirkî wazena pêroyê erdê Kurdan îşxal bika, şorişê neteweyo demokratîkî yo ke Rojawan de geş bîyo, çin bika. Dewletê cîhanî verba naye bêveng ê.  

Ganî baş bêro famkerdene ke ma bi sayê şehîdanê ke bi armancê Kurdistanêko Azad vejîyayê rayîr, ewro eşkenê dewaya cuya azade bikê. Wexto ke embaza Gurbetellî Ersoz waşt ke daşinasnayîşê fikirîyayîşî û cuyêka azade Kurdistan de bîyara ca pêroyê daşinasnayîşê Kurdî qedexe bibî. La israr û waştişê xo resnayîşê cuyêka azade rê da ke embaza Gurbetellî Ersoz sey estareyêko  geş rayîrê ma roşnîye bike. Wexto ke çeteyanê sey DAÎŞ'î waşt ke xeta merdimîya demokratîke û azade asteng bikê Arîn Mîrkane bîye adirê her merdimî ke girêdayeyê welatê xo û erjê merdimîye yê, mezgê îşxalkare de kerd weye. DAÎŞ û mamostayê ci Erdogan ameyî şiknayene. 

Teşrîna Verêna 2019 de heman tehdît û tedayê çeteyan dewam kenê. Ganî sere de her Kurdo ke zerrîya xo de waştişê Kurdistano azad weye keno, kesê ke terefgirê azadî û demokrasîyî yê mîrasê şehîdan rê wayîr bivejîyê, verba îşxalkarîye û qirkerdişî xeta xoverdayîşî xurtêr bikê. Teşrîna 2014 de Kobanê de hewnê îşxalkarî ameyî pûçkerdene. Ewro reyna dewleta faşîste ya Tirkî bi hemkarîya çeteyan wazena ke Rojawanê Kurdistanî îşxal bike. Dêrîkê ra heta Girê Spî, Serêkanîyê ra heta Kobanê binê ramancê hêrişan de yê. Pêroyê cepheyan de xoverdayîşo mêrxas esto. Destpêkê Şorişê Rojawanî ra heta ewro des hezaran ra zêdêr şehîdî ameyî dayene. Dewleta faşîste ya Tirkî û serekê aye Erdogan wazenê  ke amayoxê şaran tarî bikê. Xoverdayîşê Kobanê de no waştişê înan qirikê înan de mendo. Ewro zî ganî bi heman ruhî serê xeta nê şehîdan de xoverdayîş sey esas bêro girewtene, verba faşîzma Erdoganî û îşxalkarîye gamêke apey nêra eştene. Ganî çeteyê ke Rojawanî rê hêriş kenê, ke keyne û lajanê Rojawanî rê bitersê ke înan newe ra şarê xo rê azadîye bîyarê.No zî bi famkerdiş û wayîrvejîyayîşê şehîdan do bêro ca. Şehîdî rûmetê ma yê, caardişê xeyalanê înan ê seba welat û cuyêka azade pawitişê Rûmetî yo. 

Ma bi wesîleyê rastameyîşî yê serrgêra şehadetanê embaze Bêrîtane, embaze Gurbetelî Ersoz, embaze Arîn Mîrkane û şehîdanê sîstemê 'Şima Nêeşkenê Roja Ma Tarî Bikê' de şehîdanê menga Teşrîna Verêne, pêroyê şehîdanê Şorişî bi mînetdarîye û bi rêzdarîye yad kenî, verba rastîya înan sozê qetîkerdişê Kurdistanêko Azad, cuyêka serfîraze danê. Ma pê bawer ê ke xeyalê bi hezaran şehîdan bi şiknayîşê îşxalkarîye do tacîdar bibê. Xoverdayîşê şaran do teqez ser bikewê."