Komîteya Kultur û Hunerî ya PKKyî şehîde Hozane Mizgîne (Gurbete Aydin) serrgêra 30. ya şehadetê ci de i mesajêkî yad kerde.

Mesaj wina yo: ''Menga gulane menga şehîdan ê çêran a ke şehîde Mizgîne zî nînan ra yew a. Hunermenda şorişgêre û fermandara efsanewîye Gurbete Aydin 11ê gulana 1992î de Tetwan de tewra karwanê şehîdan bîye. Şehîde Mizgîne peyê xo de modelêka kesayetê cinîya azade, hunermend û şorişgêre ma rê verda.

Embaze Mizgîna ke 1980 de tewra têkoşînê azadîye bena, dima ke warê Vakurî de karan kena 1982 de seba rêxistinkerdişê karanê kultur  û hunerî derbazê warê Ewropa bena. Dima ke wextêk warê Rayberîye de mende 1991 de ancî derbazê koyanê Kurdîstanî bena. A warê Xerzanî de rixmê zor û zehmetîyan zî erkê xo yê fermandarîye ana ca û xeta cinîya azade bi hawayêkê serkewteyî dîyar kena.

Şehîde Mizgîne wayîra armanc, xeyal, hîs, fikr û xîretêkê zaf pîlî bîye, seba felsefeya cuya azade ya Rayber Apoyî aye hunerê xo rayîr a berd, xo bi armancê xo kilîd kerd. A zulm, îşxalê dişmenî, hîs, dej û xoverdayîşê şarî bi rayîrê hunerê xo eşkera kerd. Ewro modernîteya kapîtalîste huner û hunermendan sey hacetêkî şuxilnena. Şehîde Mizgîne rayraşîyayîşê xo yê huner û milîtanîye de vera na hişmendî xetêka azade dîyarîya ma kerde.

Ewro gerîlayê azadîye seba azadîya erd, Rayberî û şarê xo bi hawayêkê fedayîyî şer kenê û sîstemê dişmenî parçe kenê. Ganî hunermendî nê têkoşînê gerîlayan pîl bikerê. Embaze Mizgîne bi tewir û cuyê xo, bi têkoşîn û şorişgêrîya xo bîye sembola şehîdanê têgêrayîşê kultur û hunerî yê azadî. Reyna 11ê gulane zî sey roja şehîdanê têgêrayîşê kultur û hunerî ameye îlankerdene.

Ma sey şagîrt û embazanê aye, reyna embaze Mizgîne bi rêzdarî yad kenê û soz danê ke tewirê ci do bibo perspektîfê ma.''