Komxebata partîyanê sîyasîyan ya ke bi armancê Yewîya Neteweyîye ameye sazkerdene muneqeşayanê 2 rojan ra dima qedîyaye. Temsîlkaranê partîyan muneqeşayan ra dima beyanname pare kerd. Endamê Meclîsê PDK-Tyî Ozan Kardaşî bi kurdkî û serekê KKPyî Sînan Çîftyurekî zî bi tirkî eşkerayîye wende.

Eşkerayîya komxebate wina ya:

''Komxebata ke bi armancê Yewîya Neteweyîye ameye plankerdene 18-19ê çeleyê 2020î de rojdemanê xo de bi hawayêkê serkewteyî qedîyaye. Qiseykerdişanê bi kurmanckî, kirmanckî û tirkî ra dima nêzdîyê 130 sîyasetmedarî, akademîsyenî, cinîyî, ciwanî, seydayî û dezgehê sivîlî beşdarê komxebate bîyî. Beşdaran pêşnîyazê xo ardî ziwan. Muneqeşa û pêşkeşan hewcedarîya yewîya neteweyîye, modelê ci, bername, îdare û meseleyanê ke verê yewîye de yê û metodanê çareserîye ser o dewam kerd. 

Cinîyan ra heta ciwanan, melayan ra heta komunîstan pawitişê yewîşya neteweyîye kerd.Qadro û partîyanê kurdîstanîyan venga yewîya neteweyîye dabi û no vengdayîş bi hawayêkê zelalî komxebate de ame mojnayene. Na hewcedarî ya ke Qazî Mihemedî ra heta ewro ameye hewcedarîya yewîya Başûrê Kurdîstanî û Rojawanê Kurdîstanî û vengdayîşê dinya yê ke ma rê vano: "Eke şima bibê yew ma do paştî bidê şima''. Na rewşe bena ke dinya de reya verêne bi nê hawayî vejîyaye meydan.

Nê şert û mercan de qadro û partîyê ma yê sîyasîyî ganî seba Yewîya Neteweyîye gamêke bierzê. Komxebate de gama yewîne ameye eştene. O girîng no yo ke ganî nê gamî dewam bikerê. Yewînanê komxebate perpektîfê xo eşkera kerd û vat: ''armancê îtîfaqê yewîye bi qerardarîye û îstîkrar rayîrşîyayîş o''. Komxebate çar parçeyane bînan de xo geş bikera û Kongreya Neteweyî ya pîle bikera.Ma bi hêvî kewtî komxebate û ma dî ke temamê komxebate de zî heman hêvî xo mojnena ra. Seba çalakkerdişê na hêvîye komxebate no mesaj da; ma hem muneqeşa bikerê û hem zî bi hawayêkê çalakî şorê."