Konferansê Pîlî yê DBPyî yê Amedî de Hemsereka Pêroyî ya DBPyî Salîha Aydenîz vat ke heta tecrîdî bişiknê ê do xo ver bidê. Konferans de dîya zanayene ke vera tecrîdî 18ê teşrîna peyêne de 'Rayraşîyayîşê Azadîye yê Gemlîkî' do bêro kerdene.
Konferansê Îstîsnayî yê 6. ra verî Partîya Herêmanê Demokratîkan (DBP) qezaya Rêzanî ya Amedî de salonêka dawetî de bi sloganê şîarê 'Ma bi komelê rêxistinbîyayeyî cuya azade awan bikerê' konferansê xo yê pîlî kena.
Bi hezaran kesî tewrê konferansî bîyî. Hemserekê Kongreya Komelê Demokratîkî (KCD) Berdan Ozturk, Hemserekê HEDEPî Tulaye Hatîmogullari û Tuncere Bakirhan, Hemsereka YSKPyî Canane Yuce zî konferans de amade bîyî. Konferans de sloganê sey "Bijî Serok Apo" û "Bê Serok jiyan nabe" ameyî berzkerdene.
Konferans de hêverî Hemsereka DBPyî Salîha Aydenîz qisey kerd. Aydenîze vat: ''Êyê ke wazenê kurdan çin bikerê wa bizanê ke kurdî do tim xo ver bidê. Kurdî do Meclîs de, kuçeyan de û her ca de têkoşînê xo pîl bikerê. Kurdî azadîye wazenê. Seba azadîye û demokrasî zî rayîro raşt Konfederalîzmo Demokratîk o. Çareserîya meseleya kurdan de zî adreso raştikên Birêz Abdullah Ocalan o. Tecrîd teyna vera Birêz Ocalanî ney vera pêro kurdan yeno caardene. Heta ke tecrîd bişikîyo û Birêz Ocalan azad bibo ma do xo ver bidê.''
Qiseykerdişê Aydenîze ra dima sloganê 'Xeta ma Bêrîtan a, Rayberê ma Ocalan o' ame berzkerdene.
Salîha Aydenîze ra dima Hemserekê DBPyî Keskîn Bayindirî qisey kerd. Bayindir qiseykerdişê xo de babetanê tecrîdê Îmraliyî, modelê Rojawanî, perwerdeyê bi kurdkî û çareserîya meseleya kurdan ser de vindert. Keskîn Bayindirî da zanayene ke heta ke Rayberê Şarê Kurdî Abdullah Ocalan azad nêbo meseleya kurdan çareser nêbena û eke meseleya kurdan çareser nêba qet yew meseleya welatî çareser nêba.
Hemserekê KCDyî Berdan Ozturkî zî konferans de qisey kerd. Ozturkî bale ante ser ke qet yew hêriş pê kurdan nêeşkayo û vat: ''Ma azadîye û cuyêka rûmetêne wazenê. Ewro Filîstîn de zî Kurdîstan de zî û pêro dinya de hişmendîya neteweya demokratîke bena sebebê qirkerdişan. Ma na hişmendîye qebul nêkenê.''
Ozturkî pê hesna ke 18ê teşrîna peyêne de her cayê Tirkîya û Vakurê Kurdîstanî ra ver bi Gemlîkî vera tecrîdê Îmraliyî û seba demokrasî, azadîye û haştîye 'Rayraşîyayîşê Azadîye' do bêro kerdene. Ozturkî vat: ''No tecrîd hînî nêno qebulkerdene. Seba azadîya Ocalanî têkoşînê ma tim do dewam bikero. Ma Rayraşîyayîşê Azadîye yê Gemlîkî de tewirê xo yê vera tecrîdî eşkera bikerê.''
Hetê bînî ra konferans de seba hemserekîya DBPyî Çîgdeme Kiliçgun Uçar û Keskîn Bayindir ameyî pêşnîyazkerdene.
