Hemserekîya Dîwanê KONGRA-GELî bi wesîleya 21ê Adere Roşanê Newroze mesajê fîrazkerdişî pare kerd û veng da ke wa na Newroze de cewabê tehdîtanê dewlete bêro dayene.

KONGRA-GELî sere de roşanê Rayberê Şarê Kurdî Abdullah Ocalan û heme tepişteyanê azadîye roşanê şaranê Kurdîstan û Rojhelatê Mîyanênî fîraz kerd. Reyna şexsê Mazlûm Dogan, Sema, Zekîye, Rahşane, Bêrîvane de heme şehîdê Newroze bihurmet yad kerdî sozê caardişê waştişanê înan newe kerd.

KONGRA-GELî  ard ziwan ke şarê Kurdîstanî emser Newroze do bi coşê Garê fîraz bikerê û vat: ''Dewleta tirke dişmenê şarê kurdî û Kurdîstanî ya. Heftanîn û Garê de derbeyê pîlî werdî û konseptê şerê ci yê teknîkî hetê gerîlayan ra pûç ame vetene.''

Mesaj de nê ameyî vatene:  

''Îqtîdarê faşîst yê AKP-MHPyî ke rixmê teknîkê xo vera HPGyî ser nêkewt narey pê xebaranê derheqê cuya Rayber Apoyî şaranê Kurdîstanî û Têgêrayîşê Azadîye tehdît keno. Coka ganî semedê şaranê Kurdîstanî Newroze bibo cewabdayîşê tehdîtanê dewleta tirke ya faşîste.  Rayber Apo kurdê/a  azadî/e  û şaranê Kurdîstanî sey 'şarê Newroze' name keno. Ganî na Newroze de şar tewr zaf tewre şayîyaynê Newroze bibo û heskerdiş û girêdayîya xo yê Rayber Apoyî ramojno ke mesajê xo bido her hetî. Bitaybetî nê wextî de tewrbîyayîşê Newroze zaf muhîm o.

Rayber Apo xeta sûre ya têgêrayîş û şarê ma yo. Semedê ma babeta estbîyayîş û çînbîyayîşî yo. Ganî rayrapêroyîye zixma zext bikero ke berê Îmraliyî bêrê akerdene,  avûkat û keyeyê ci ey dir pêvînayîş bikerê û xeberêke bigîrê.

Şayîyê Newroze eynî wextê de welat û teberê welatî de do bibê wesîleya pîlkerdişê Hamleya ''Wextê azadîye yo'' zî. Ma sey şaranê Kurdîstanî Rayber Apoyî rê deyndarê. Şexsê Rayber Apoyî de şaranê Kurdîstanî rê îşkence yeno kerdene. Ma pê Hamleya ''Wextê azadîye yo'' nê zulmî rê vanê hinî bes o.

Dewleta tirke ya faşîste verê xoverdayîşê Rayber Apoyî, Têgêrayîşê Azadîye û şarê ma de krîz de ya. Seba ke vera HPGyî bêçare yo hêrişê şar û HDPyî kena. La ê se kenê wa bikerê vînkerdişî ra do mexelisîyo. Nika wextê vînkerdişê dewleta tirke û azadîya Rayber Apo û şaranê Kurdîstanî yo. Vînîkerdişê dewleta tirke do çar leteyanê Kurdîstanî de semedê şaran beranê demokrasîyî abikero. Na çarçewe de ma xoverdayîşê şarê xo zerasafî ra selam kenê Newrozê şaranê Kurdîstanî fîraz kenê û serkewtiş wazenê.''