Fermandarîya Qerargehê HSM’yî eşkera kerd ke 57 kesî tewrê kombîyayîşê Konseya Fermandeyî ya HPG'yî bîyê û kombîyayîşî şeş rojî dewam kerdo. HSM’yî da zanayene ke “no kombîyayîş do bibo gamêka tewr muhîme yê prosesê neweyî.”

Eşkerayîya kombîyayîşî de ame vatene ke xeylî qerarê muhîmî ameyê girewtene û bale ancîyaye xeylî nuqtayan.

Mîyanê nînan de qerarê sey “bi xeta gerîlayî têgêrayîşo newe, cakerdiş, cuye, organîzebîyayîş û pratîkkerdişê terzê şerî bi hawayêk rastî,” û “bi performansê gerîlayî yo ke goreyê her tewir teknolojî û fealîyetê îstîxbaratî yê hemdemî têgêreno û wayîrê qerardarîya afernayîşê gerîlayê serkewtişî yê seserra 21’ine yo” bale antî.

HSM ard ziwan ke do serra 2019’î bikerê serra ke seba şarê Kurdî û têgêrayîşî bikerê serra destkewteyanê pîlan.

SOZÊ ADIRÊ NEWROZE BI SERKEWTIŞÎ TACÎDAR KERDIŞÎ

Eşkerayîya ke hetê Fermandarîya Qerargehê HSM’yî ra amî dayene wina ya:

“Roşanê Newroze yo ke roja xoverdayîş, azadî, yewîye û serkewtişî ya kulturê tarîxkî yê şaranê Rojakewtena Mîyanêne de û tarîxê estbîyayîşê şarê Kurdî de wayîrê cayêkê muhîmî ya, heman wextî de sey roja ke Rayber Apoyî reya ewilêne dest bi rayraşîyayîşê xo yê pîlî kerdo tarîx de ca girewto.  Bi nameyê gerîlayanê azadîya Kurdistanî ma Roşanê Newroze sere de  Rayber Apoyî rê û şexsê Leyla Guvene de heme xoverdayoxanê grevê vêşanîye rê, şaranê herême rê, şarê Kurdistanî rê, keyeyanê şehîdan rê û hemrayanê xo rê pîroz kenê. Ma şexsê Kawayê Hemdemî Mazlûm Doganî de ke bi xoverdayîşê xo na roja pîroze hîna kerde manîdare heme şehîdanê xo yê qehremanan bi vîr anê, ma soz danê ke ma do rayîrê înan ser o şirê û xoverdayîşê adirê Newroze bi serkewtişî tacîdar bikerê.

Şarê ma û mucadeleyê azadîye şexsê grevkerdoxanê vêşanîye de bi xoverdayîşêkê pîlî û bi ruhê fedaîyî û qerardarîya hemra Zulkuf Gezenî keweno Newroza 2019’î û ver bi ameyoxî şino. Zîndanan de û teber de ruho xoverdayox ê grevkerdoxan ke beno berz û xo keno feda, çalakîya Xakurkê Kevortê ya fermandaranê ercayeyan ê ke şexsê Şehîd Derwêş Oremarî de qehremanî ramote her kesî û tewiro fedaî yo Apoperwer do seba ciwanîya Kurdistanî tim bibê rayber û ruhê mucadeleyî.   Tarîxê mucadeleyê ma de Newrozî tim sey rojê ke vejîyayîşê hemlekîyî virazîyayê tarîx de ca girewtê. Newroza 2019’î zî bi hemleya pîle ya “Ma tecrîdî bişiknê, faşîzmî birijnê û Kurdistanî azad bikerê” yena pêşwazîkerdene. Nika ra bîyo eşkera ke do na Newroze bibo wesîleya vejîyayîşanê neweyan û biîhtîşaman.

KOMBÎYAYÎŞ GAMA TEWR PÎLAN RA YEWE YA PROSESÊ NEWEYÎ YA

Na merheleya muhîme ya tarîxî de Hêzê Pawitişê Şarî yê Kurdistanî xeta Rayberîye de netîceyê kesafetanê serranê peyênan de kombîyayîşê xo yê Konseya Fermandeyî bi serkewtişî viraşte û no kombîyayîş do bibo gamêke tewr muhîme ya prosesê neweyî.  Kombîyayîşê ma binge eşt ke hemleya Newroze bibo sebebê vejîyayîşêkê xurtî û seba serfirazîya mucadeleyê ma netîceyê xeylî muhîmî vejîyayî werte. Kombîyayîşê ma yê Konseya Fermandeyî ya HPG'yî ke menga ravêrtî de virazîya, 57 hemrayî tewrê ci bîyî û bi munaqeşeyan bi hawayêkê serkewteyî ravêrt.

PLANSAZÎYA ŞERÎ YA SERRA 2019’Î

Nê 2 serranê peyênan de nê kesafetê ke xo sey projeyê newe ra awankerdişî dayî teber û eslê xo de afernayîşê gerîlatîya modernîteya demokratîke xo rê kenê amac kombîyayîşê ma yê Konseya Fermandeyî de bi hawayêkê hîrayî ameyê munaqeşekerdene û çarçewaya nê munaqeşeyan de qerarê muhîmî ameyê girewtene. Hemverê îrade û xoverdayîşê bêhempa yê Rayber Apoyî de û hemverê rastîya şehîdanê ma yê qehremanan de krîtîk û xokrîtî ameyê kerdene, bi dersanê ke demê şerî de ameyê vetene ameyo plankerdene ke serra 2019’î bibo serra serkewtişî. Ame tespîtkerdene ke heme hêrişê dewleta qirkerdoxe yê AKP-MHP’yî yê hemverê şarê ma û hêzanê ma yê Vakurê Kurdistanî û yê ke hemverê Wareyê Pawitişî yê Medya de ameyê kerdene bênetîce mendê. Kombîyayîşê ma de vejîya werte ke xeta gerîlayî ya bi têgêrayîşê neweyî, cakerdiş, cuye, organîzebîyayîş û pratîkkerdişê terzê şerî yo newe do heme tewiranê hêrişanê dişmenî veng a vejo û serkewtişî xo reyde bîyaro. Nê bingeyî de kombîyayîşê ma bi viraştişê plansazîya şerî ya serra 2019’î wesfê konferansî de qerarî girewtê û resayo sewîyeyêka xurte.

HEMVERÊ TEKNOLOJÎYA ÇAXÎ DE GERÎLAYÊ PROFESYONELÎ

Hetê Gerîlayê Azadîya Kurdistanî ra no kombîyayîşê Konseya Fermandeyî kombîyayîşo tewr kesif ê serranê peyênan bi. Tecrubê 35 serrî yê gerîlatîye ser o ame vindarnayene çarçewaya taktîkî amî zelalkerdene. Eke projeyê newe ra awankerdişî bêro pratîkkerdene serkewtiş qetî yo.  Kombîyayîşê ma bingeyê xo qerardarîya newe ra awankerdişî de bi performansê gerîlayî yo ke goreyê her tewir teknolojî û fealîyetê îstîxbaratî yê hemdemî têgêreno û wayîrê qerardarîya afernayîşê gerîlayê serkewtişî yê seserra 21’ine yo ser o ronayo.

BI XETA GERÎLAYÎ YA NEWÎ MÛSAYÎŞANÊ VERÊNAN RÊ PEYNÎ YENA

Serra 2019’î seba gerîlayan yena manaya mûsayîşanê xo yê verênan ke dişmeno tewr pîl ê caverdayîş. Bi xeta newî ya gerîlatîye do serra 2019’î seba şarê ma û têgêrayîşê ma bibo sera destkewteyanê pîlan.  Ruho fedaî yo Apoperwer ke ewro bîyo cimatkî û açarîyayo hemleya xoverdayîşî sey Gerîlayanê Azadîya Kurdistanî mesuldarîyêka pîle dano doşanê ma ser zî.  Bi na hişmendî û mesuldarîye ma sey Hêzê Pawitişê Kurdistanî Newroza ke sembolê destpêkê neweyî û xoverdayîşê biîhtîşamî ya bi qerardarîya tarîxîye ya Konseya Fermandeyî û bi qerardarîya Rayberîya Azade û Kurdistanê Azadî pêşwazî kenê. Nê bingeyî de ma Roşanê Newroze yê hemeyê şarê xo û xoverdayoxan bi ruhê fedaî yê coşîya gerîlayê Apoperwerî pîroz kenê, hurmetê xo anê ziwan.”