Vera derbeya qeyûmî ya îqtîdarî Kurdîstan de ewro zî çalakîyan dewam kerd. Çalakîyan de vera hêrişan hêrs ardîya ziwan û ame vanete ke ê se kene wa bikerê rixmê heme hêrişanê înan kurdî do çirey verê înan de çok nêdê.
Vera destsernayîşê 5 şaredarîyanê bînan ê HDPyî Sêrt, Îdir, Qers û Agirî de çalakîyî ameyî viraşene û binpaykerdişê îradeyê şarî ame şermezarkerdene.
Rêxistena HDPyî ya Sêrtî vera xespkerdişê şaredarîye û destbendkerdişê hemşaredaranê xo eşkerayîyêke daye. Parlmeneterê HDPyî û endamê Meclîsê Mayanê Haştîye tewrê eşkerayîye bîyî. Wekîle Meral Daniş Beştaşa ke tîya qisey kerd vat: ''Hêrişê vera HDPyî ramojnenê ke ê senî ma ra tersenê. Wa qeyûm zaf hole bizano ke şarê ma ey nas nêkeno û wayîrê hemşaredaranê xo vejîyeno.''
Îdir de zî bi eynî waştişî eşkerayîyêke ameye dayene. Çalakwanê ke mîyan înan de wekîlê HDPyî zî estbî verê banê partî ra ver bi şaredarî kewtî rayîr. La polîsan vernîya înan girewt. Wekîl Mahmut Togrulî ke tîya bi nameyê şelîgî qisey kerd vat: ''Îqtîdaro faşîst se keno wa bikero nêeşkeno îradeyê şarî bişikno. Ma do verê hêrişan de milê xo çewt nêkero û têkoşîn rê dewam bikero.''
Reyna Qers û Agirî de zî bi çalakîyan hêrişê hukmatî yê vera kurdan ame şermezarkerdene û ame vatene ke hêrişkarî nêeşkenê îradeyê kurdan teslîm bîgêrê ma qeyûman nasnêkenê û destkewteyanê xo canêverdenê.
