Meclîsê Cinîyan ê HDPyî yê Stewrê Mêrdînî de çarçewa 25ê Teşrîna Verêne ya Roja Têkoşînê Vera Şîdetê Serê Cinîyan de taxa Ewîna ya Stewrî de kom biyî la leşkeran destûr nêda cinîyan.

Wekîlê HDPyî yê Mêrdînî Ebru Gunay û Hemsereka Şaredarîya Stewrî Gulistane Oncu zî tede zaf cinîyî taxe de ameyî pêser. Leşkeran dormeyê ciîyan girewt û seba çalakî û aktîvîteyan qedexeyê Walîtî sey sebeb mojna û destûr nêda kombîyayîşî. Gunaye nêrazîbîyayîşê xo mojna. Selahîyetdarêkê leşkerî Gunaye rê vat ke tîya de provokasyon meke. Gunaye zî vat: "Şima mesele provoke kenê. Çira şima nêverdenê ke cinîyî kom bibê?" Leşkeran nêverda ke zîyaretê esnafî zî bêro kerdene.