Qezaya Rûbarokî ya Colemêrgî de şiwanê bi nameyê Şahap Şendolî yo 23 serre û Celîl Ekîncîyo 17 serre bîyî hedefê leşkeran ê tirkan.

Goreyê zanayîşan serebût deweka Çemêkurkê ya dewa Heci Beyê de 18ê gulane de saete 07.00 de qewimîya.

Şendol wexto ke gêrayênê pêzê xo, Celîl Ekîncîyî wexto ke bazirganîya cixareyan kerdêne bê 'hîşyarkerdişî' leşkeran guleyî eştî nînan ro û wird hemwelatîyî zî birandar bîyî. Şarê herême wird kesî wedarnayî nêweşxaneyêkê Başûrê Kurdîstanî. Şendol nêweşxane ra vejîya la Ekîncîyo ke pîzeyê xo ra birîndar bîyo hema zî binê tedawî de yo.

Wekîlê HDPyî yê Colemêrgî Saît Dedeyî dîmenê birîndarîya Ekîncîyî pare kerde û vat: ''Reyan Rûbarok de serê sînorî de di sivîlê bêçekî pê fîşekanê leşkeran  birîndar bîyî. Muhakemeyo ke kerdoxan paweno tira persena; şima goreyê kamyew qanûnî têgêrenê, heqê cuye çade yo!''

Kekê Ekîncîyî Reşat Ekîncîyî Ajansê Mezopotamya rê qisey kerd û vat: ''Birayê min o qij serê sibayî derbazê herêma Kurdîstanî bi. Dûrî de şiwan Şahap Şendolo ke merdimê ma yo vîneno û wazeno pîya derbazê Tirkîya bibê. Rayîrê agêrayîşî de qereqol bêhîşyarî guleyan erzeno înan ser. Birayê mi û şiwan Şendol sey birîndar bi saetan erdî ser o manenê. Leşkerê nêşinê cayê înan. Dima ke merdimanê ma pê telefonî xebere daye ma ma şîyî herême û ma dî ke înan astorê ma kiştê. Şahap û birayê mi zî hetê astorî de rakewte bîyî. Ma paştîya xo de birîndarê xo wedarnayî nêweşxane. Birayê mi hema zî uca de yeno weşkerdene.''