Leyla Guvene: Hewce yo ke vengê Birêz Ocalanî biresnîyo teber

Parlementera  HDP’yî ya Colemêrgî û Hemsereka KCD‘yî Leyla Guvene, derheqê meseleyanê rojedemî de qisey kerd û vat ke “Ma reyna mîyanê yew kaosî ra vîyarenê. Hewce yo ke vengê Birêz Ocalanî biresnîyo teber.”

Grevê vêşanî yo ke 8‘ê Teşrîna Peyêne 2018‘î de Hepisxaneyê Tîpê E‘yî yê Amedî de rayberîya Parlementera HDP’yî û Hemsereka KCD’yî Leyla Guvene, bi talebê wedaritişê tecrîdî yo ke Rayberê Şarê Kurdî Abdullah Ocalanî rê yeno kerdene ameybî destpêkerdene, vilayê hepisxaneyanê iû Tirkîya bîbî. 5000 ra  zîyadêrî hêsîrê PKK û PJAK‘î tewrê nê grevî bîbî û 200 rojan ra pey nê talebê grevkerdoxan ameybî ca û grev bi awayekî ser kewtîbî. Guvene roja 79.ê çalakîye de ameybî tehlîyekerdene û keyeyê xo de dewamê xoverdayîşê xo kerdîbî. Grevê vêşanîye yo pîl tena vilayê Kurdistan û Tirkîya ney vilayê çar hetê dinya bîbî. Menga peyên a xoverdayîşî de zî 30 hêsîran çalakîya xo açarnaybî grevê mergî ser  û xoverdayîşî winî dewam kerdîbî.

Guvene nê xoverdayîşî yo ke 200 roje dewam kerdo ra pey Amed de yew neweşxaneyê teybetî de ameybî tedawîkerdene û di hefteyan ra pey tedawîyê xo qedîyayabî. Guvena ke nêweşxane ra vejîya la hîna zî bi temamî nêbîya weşe, derheqê babetanê rojdemî de nê beyanatî dayî bi ANF‘yî.

“Eşkera bî ke ma heqdar ê. Birêz Ocalanî hîna yewbîndîyayîşê destpêkî de çîyê gelekî girîngî vatî. Pêşnîyarê çarekerdişî kerdî ke bi naye bîhne daye sîyasetê Tirkîya. Ma eynî wextî de vatêne; eke Birêz Ocalan qisey bikero do rewşeka girînge vejîya warye. Ma nika zî eynî fikrê xo ser o yê. Ma vînenê ke nika kaosek esto. Heroj gefî yenê werdene ke dest bierzerê bi Rojawayî, cenazeyî yenê ardene û şer qewemîyeno. Ancîya wina heroj  operasyonê qirkerdişê sîyasî yenê kerdene û bi seyan merdimî yenê girewtene. Derbe dayîya bi hîrê şarêdarîyanê pîlî yê HDP‘yî ro û qeyumî yenê tayînkerdene. Nika zî nêverdanê Birêz Ocalanî reydî yewbîndîyayîşê serûberî bêrê kerdene. Eynî wextî de kenê ke kaosî vejê warye.“

'Ganî Vengê Ma Xurtêr Berz Bibo‘

Guvene behsê ci kerd ke galê ver a Rojawa, keyeyê ke verê awanîya HDP‘yî yê Amedî de dayîyê roniştene û tayînkerdişê qeyuman yewbîn ra girêdayî yê û tespîteko winasî kerd: "Prosesê winasî de ganî vengê ma hîna xurt berz bibo. Reyna seba ke ma nê meseleyan pîya hal bikerîme ganî ma îradeyekê xurtî nîşan biderê. Her çî ra ver zî ganî merdimî raştîye ra vaje ‚raşt‘ a. Wexto ke ma nê yewî kerdî beno ke ma bibîme hedef  la ma do mesulîyetê xo yê tarîxî bîyarê ca. Ma mecburê ke na yewe bikerê. Şorişgêrî, demokratî, sosyalîstî, pawitoxê heqanê merdiman û her kes o ke wazeno  Tirkîya pîl biba ganî qisey bikero û vengê xo berz bikero. Ma yew prosesê winasî de yê.

'Hêzê Darbeyî Do Bikewo Dewre‘

Guvene bal ante ser ke Tirkîya bi awayekê pozîtîfî aver nêşona û wina vat: "Eke bi nê awayî dewam bikero, senî ke Birêz Ocalanî vatbî hêzê darbeyî do newe ra bikewo dewre. O taw Tirkîya çi rey do meeşka tewrê Yewîya Ewrupa biba û do meeşka biba welateko demokratîk. Coka vurîyayîşeko bingehîn hewce yo. Rayîrê na yewe zî qanuno bingehîno newe yo. Bi serran o ke her partîya sîyasî ya ke bena îqtîdar vana ke ganî kanuno bingehîno newe bêro amedekerdene la nê karî nêkenê. HDP nika na meseleya girînge vînena û  çarçiwaya konseptekê prosesê neweyî yê adalet û qanunê bingehînî de dîyarê gelek hêz û derdoran bena. No gelekî girîngo û ganî naye rê bereyî bêra kerdene."

Bi Mutabaqatê Dolmabehçeyî

Guvene bal ante ser ke, seba ke çarçiwaya qanunê bingehînî bêra dîyarkerdene eke 10 madeyê ke Birêz Ocalanî Mutabaqatê Dolmabahçeyî de dîyar kerdîbî bigîrîyê çiman ver o taw meseleya kurdan do hal biba. Guvene dewam kerd û wina vat: "Kurdî do bi ziwan, kultur û nasnameyê xo biciwîyerê. Na yewe mumkun a û zaf cayanê dinya de esta. Mavajê Rojawa nimûneyek a. Rojawa de tena Kurdî çin ê, zaf şarê bînî zî estê. Pêrunan pîya Surîyayeka demokratîke awan kerde. Seba ke dej bêro vindarnayene û seba halkerdişê nê meseleyan qanuno bingehîno demokratîk hewce yo. "

Guvene tewr peynî de dîyar kerd ke her şert û mercî de do destkewteyanê şarê xo bipawerê.