Birayî Abdullah, Ozcan û Ercan Akkan ê ke qezaya Licê ya Amedî  de nişenê ro, 10ê Kanûna 2018î de qereqolê Mermerî, nuqteya ewlehîye ya leşkerîye de ameyî vindernayene û no qereqol de rastê heqaret û îşkenceyî ameye. Qaso ke birayan ra Abdullah Akkan vano, kincê sereyê îna şelênayî û ci rê  heqaret ameyo kerdene.

Goreyê vatena Abdullah Akkanî, leşkeran nuqteya ewlehîye de wesayîtê înan dayo vindertene û seba ke sehnayîşê zanayîş ê pêroyî (GBT) nasnameyê înan ci ra girewtî. Pey cû leşkeran ê berdê peyê barîyeran û kincê înan şelênayê û ci rê heqaretî kerd.

Akkan vano sehnayîşî ra dima waşt ke ma şapikanê xo bivejê û derheqê qewimîyayîşî de wina qisey kerd: “Ma ke şapîkê xo nayî ro, nafa zî tumanê ma vetî û her cayê ma kontrol kerd. Pey cû ruhsata wesayîtê ma girewte û ma reyna sehnayme. Wesayîtê ma de yew delîlê sûcî ke nêame dîyayene mi pers kerd û va ma eşkeme şime. Mi ke wina va hîrê leşkeran destê ma pey ra pê girewtî û ma berdîme fermandarê qereqolî het. Fermandar çawişo pispor bi. Bi ‘‘ terorîstê sey şima“ dest bi qiseykerdişî kerd û ma rê xeber û qiseyê giranî vatî.  Pey cû reyna ma sehnayîme û nasnameyê ma çingê rîyê ma kerdî û bi heqaret û teda ma eştîme teber.“

Abdullah Akkan qewimîyayişî ra dima şî Dozgerîya Komare û derheqê personelê qereqolî de gerre kerd.