Dêrsim de HDP, DBP, EMEP, ESP û Partîzan ameybî têhet û Yewîya Hêzî ya Şoreşgêre naybî ro. Hemserekê Yewîya Hêzî ya Şoreşgêre ya Dêrsim‘î Nurşat Yeşîle û Hidir Demîrî derheqê weçînayîşî de qisey kerd.

QEYÛM POLÎTÎKAYA ASÎMÎLASYONÎ DOMNENO

Nurşat Yeşîle, xeylî serrî Xarpêt û Dêrsim de sey hemşîra xebetîyaye û seba ke endamê SES’î ya xeylî dolimî ameya surgunkerdene. Bi KHK‘yî ameya îxrackerdene û 5 serrî yo ke Dêrsim de manena. Yeşîle serekîya SES’î ra dima bîye endama şaredarîye.

Yeşîle nêzdîyê 20 serrî yo ke sendîka de mucadele kena û wazena mucadeleyê xo bi îdareyê herêmkîyî dewam bikero. Yeşîle bale ante xebatanê qeyûmî yê Dêrsimî ser û va; “Pêro projeyê ke ardê ca, yê DBP yê. Qeyûmî Dêrsim de tena roşnayî kerdê zêde û polîtîkayê asîmîlasyonî aver berdê. Polîtîkayê ey kultur, bawerî û ziwanê ma ra teber ê û bi no qeyde asîmîlasyonî keno xorîn.“

Yeşîle qiseykerdişê xo de bale ante îradeyê cinîyan ser û va: “Xeylî yewîyê Şaredarîye yê ke seba cinîyan ameybî awankerdene hetê qeyûmî ra ameyî padayene. Ma do pêro sazîyanê xo newe ra awan bikerê. Ma do pêroyê taxan de meclîsanê cinîyan newe ra ronê û hêzê cinîyan her ca de newe ra awan bikerê. Heqê ma yê ke hetê qeyûmî ra ameyê gaspkerdene, ma do peyser bigîrê. Nika Şaredarîya Dêrsimî de, bi name û rengê cinîyan qet çîyêk nêmendo. Ma do 31’ê Adare de, bi paradîgmaya azadîperwerîye bajarê xo newe ra bigîrê xo dest. Şaredarîya ke bîya sey qereqol, ma do newe ra bikerê xizmetê şarê xo.“

CINÎYAN RA PAŞTDARÎYE

 Yeşîle partîyê bînî nîşan dayî û va 81 bajaran de tena 5 namzetê cinîyî ameyê musnayene. No derheq de HDP sey nimûne nîşan daye û va projeya hemserekîye cinîyan rê rayîrêko muhîm akerdo û no derheq de HDP polîtîkaya xo ya azadîya cinîyan de samîmîyetê xo musnayo. Yeşîle va cinîyan mucadeleyêko bêemsal dayo û ewro wayîrê destkewteyanê muhîman ê.

MUCADELEYÊ KEDE DA

Hidir Demîr zî  Qezaya Dêrsimî Pêrtage de ameyo dinya û sey yew çepgêr lîse ra nat mucadeleyê xo domneno. Tewr pey, wexto ke îdarekarê Merkezî yê Tarım-Orkam Sen’î bi ame îxrackerdene.

Demîr îdarekarîya EMEP’î ya Dêrsimî ra ameyo û vano Dêrsim de pêro hetî ameyê têhet û nê hêzî do heta peynîye mucadele bikerê. Demîrî wina qisey kerd: “Çîyo ke ma pare mekîme û çîyo ke yewîya ma ver de astengîye bivirazo çin o. Tekane hedefê ma esto û o zî pêroyî de hemverê îqtîdarî, herême de zî hemverê qeyûmî de  bi yewîya Dêrsimî têgêrayîş o.“

MA DO DESTKEWTEYANÊ XO HÎNA AVER BIBERÊ

Demîrî qiseykerdişê xo wina qedêna: “Ma do şarê xo reyde bixebetîyê. Ma do pîya ser bikewê û xo û bajarê xo bi xo îdare bikerê. Ma wayîrê nê hêzî û nê îradeyî yê. Wezîfeyê ma yo verên o yo ka ganî ma qeyûmî tîya ra def bikerê û bierşawê. Ma do 31’ê Adare de ser bikewê û pêroyê projeyanê xo, bi şarê xo reyde bîyarê ca.“