'Ma problemê Çewligî bi ferasetê modernî çareser bikerê'

Namzetê HDP’yî yê hemserekîya şaredarîya Çewligî Hîşyar Ozsoyî derheqê Çewligî de va 30 serre naye ra ver, şert û mercê ciwîyayîşî Çewlîg de hîna başî bîyî.” Namzeta hemserekîye Hatîce Kavrane zî va, ”Ma do atolyeyanê cinî û berardişî awan bikerê.”

Namzetê şaredarîya Çewligî yê HDP’yî Hîşyar Ozsoy û Hatîce Kavrane û namzetê Meclîsê Şaredarîya Çewligî, rojnamegeranê Çewligî dir ameyî têhet. Kombîyayîş de namzetê şaredarîye Hîşyar Ozsoyî derheqê projeyanê xo de qisey kerd. Ozsoyî bale ante krîzê ekonomîkî ser û va: “Sermayeya mîyanneteweyîye nêwazena welatêkê nedemokratîkî de bîxebetîyo. Çunke mehkemeyî bêhet nîyê û pêroyê hêz û quwetî destê yew kesî de yê û na rewşe zî bawerîye nêdana kesî.”

ÇIYO KE NÊ BIDÊ ŞARÎ ÇIN O

Ozsoyî qiseykerdişê xo de va îtîfaqê AKP-MHP’yî welat kerdo tenge û wina dewam kerd: ”AKP serranê 90’an de merdimî kerdêne merkezê polîtîkayanê xo. La ewro bi MHP’yî eksê ci têgêreno û zaf vengîye û zaf rengîye ra kewto dûrî. Caverde averberdişê demokrasîyî, o yo ke esto zî qedênayo. Çîyo ke nê bîdê şarî çin o.

MA WAZENÊ KE BI KERDIŞANÊ XO BIBÊ LÎYAQÊ ŞARÎ

Butçeye seba îhtîyacîya şarî nêna bicaardene, seba ke tayîna rê bibo rant yena şuxulnayene. Her cayê Çewlikî ra awe herekîna, la şarê Çewligî bêawîye ver bêzar bîyo. Xeylî wext o ke ma îdareyê Çewlikî de çin ê. La eke şar ke riza bimusno ma û ma weçîno, o wext ma zî seba ke lîyaqê şarê xo bê xîzmetanê başan do bikerê.”

MA DO BI HAWAYÊ AKERDEYÎ XIZMET BIKERÊ

Ozsoyî derheqê îdareyê bajarî de va AKP hetê kapasîte ra nêeşkeno problemanê bajarî çareser bikero û wina dewam kerd: ”Manaya şaredarîye a ya ke ganî problemê şarî bêrê çareserkerdene û butçeye goreyê îhtîyacîya bajar û şarî bêro xerckerdene. Ma nika ra soz danê. Ma do butçeye goreyê îhtîyacîya şarî bişuxulnê. Ma do taxan de, bi kombîyayîşan şarê xo û sazîyanê sivîlan de bêrê têhet û îhtîyacîya şar û bajarî kifş bikerê. Ma do hesabê her qurişî bidê şarê xo. Welatanê şarî de 9 mengî zimistan esto la reyna zî rayîrê  înan û dibistanê înan akerde yê, la ê ma hîna nêeşkenê vewra zereyê bajarî pak bikerê. Ma do bi hawayê akerdeyî xizmet bikerê.”

AMED NIMÛNEYÊKO BAŞ O

Ozsoyî projeyê AKP’yî yê vurîyayîşê bajarkîyî ard vîrî û wina va: ”AKP’yî projeyê vurîyayîşê bajarkîyî açarna bi rantî û şar kerd mexdur. Ma do newe ra dest bierzê ci û bi ferasetê modernî çareser bikerê. Taxa Kulturî de 200 hemwelatijê ma kerdî mexdur. Ma soz danê, eke ma ke bêrê îdareyê Çewligî ser, ma do mabênê di mengan de nê problemî çareser bikerê û heqê şarê xo yê mexdurî bidê ci. Çewlik 30 serre naye ra ver hîna baş bi û şert û mercê ciwîyayîşî Çewlig de hîna başî bî. Şaredarîye bi butçeye nê, bi feraset û vîzyonî yena îdarekerdene. Amed bajarêko hîna pîl o, metropol o. Ma uca de bi fînansmanê herêmî û teberî yew bajaro modern awan kerd. Sazîyê mîyanneteweyîyî paştdarîye û hîbe danê şaredarîyan, ma zî projeyê wînasîyî kerdî amade û kenê ke Çewligî bikerê bajarêko modern.”

ROJDEMÊ KAVRANE DE CINÎYÎ ESTBÎYÎ

Namzeta hemşaredarîya HDP’yî ya Çewligî Hatîce Kavrane zî derheqê problemanê cinîyan de qisey kerd. Kavrane wina va: ”Çewlig de cayo ke cinîyî tede rehet bikerê çin o. Ma wazenê ke bi nameyê şaredarîye seba cinîyan cayê perwerdeyî û atolyeyanê berardişî akerê. Bi nê qeydeyî ma do bikerê ke wa cinîyî her hetê cuye de ca bigîrê û bîbê aktîf. Nêmeyê nufusê Çewligî cinî yê û ma do vera çinêhesibnayîşê cinîyan de mucadele bikerê.

Ez bi zerrîweşîye vana ke cinîyê tewr zêdeyî partîya ma de estê. Qeyûman ra ver şaredarîyanê ma de cinîyan hîna zêde ca girewtêne. No weçînayîş ra dima zî do şaredarîyanê ma de hemserekê cinîyî bibê. Ma her kesî ra ver seba ke astengdar, doman, ciwan û cinîyî rehet bikerê , bajarê xo bi hawayê modernî newe ra awan bikerê.”