Çarçewa Hemleya ‘Rayber Apoyî rê Azadîye, Meseleya Kurdan rê Çareserîye’ bi wesîleya serrgêra Komployê 15ê Sibate xeylê çalakîyî do bêrê kerdene. Vervatoxanê Hemleya ‘Rayber Apoyî rê Azadîye, Meseleya Kurdan rê Çareserîye’ Zubeyde Zumrut, Hatîp Dîcle û Sînan Onalî derheqê babete de ajansê ma rê qisey kerd.

Hatîp Dîcle vat: ‘’Çarçewa hemle de xeylê çalakîyî ma kerdî. Hemle tecrîdê Îmraliyî teşhîr kerd û tedaya dewleta tirke kerde. Nika ma safhaya diyîne ya hemle anê ca. Na safha de ma azadîya Rayber Apoyî kenê hedef. Çunke çareserîya meseleya kurdan bi azadîya Rayber Apoyî bena. ‘’

Zubeyde Zumrut vat: ‘’Ma çarçewa hemle de Strasbourg de rayraşîyayîş û mîtîngêkî serûber bikerê. Hetê bînî ra ma kampanyayanê îmzayan ûsn. xebatan kenê. Nê prosesî de nîqaşê serê çareserîye yenê kerdene. Rayber Apoyî reyde pêvînayîşî yenê kerdene. Ma armanc kenê ke bi çalakîyanê xo paştî û hêz bidê prosesî.’’

Sînan Oralî vat: ‘’2024 de kurdî û dostê înan çarçewa hemle de meydanan de bîyî. Ma wazenê ke xo hîna rêxistin bikerê û çalakîyanê hîna pîlan bikerê. Nika ma armanc kenê ke menga nîsane de konferansêkê pîlî bikerê û Konseya Ewropa, Parlamentoyê Ewropa û Neteweyanê Yewbîyayeyan de biwazê ke seba azadîya Rayber Apoyî û çareserîya meseleya kurdan xîret bêro kerdene.’’

Vervatoxan peynî de wina venga kurdan û dostanê înan da: ‘’2025 seba herême û dinya serrêka girîng a. Serebûtanê nikayênan ra zî no yeno famkerdene. Seba ke hemle ser bikewa ganî ma têkoşînî her ca de pîlêr bikerê, xo hîna bi rêxistin bikerê û vengê xo berz bikerê.’’