26ê çeleyê 2015î de Kobanê destê cerganê DAÎŞî ra amebî xelisnayene. Birîndaranê Xoverdayîşê Kobanê derheqê azadbîyayîşê Kobanê de ANFyî rê qisey kerd.

Îsmaîl Elîyo ke Kobanê bi nameyê Xalê Simoyî şinasîyeno pare kerd ke DAÎŞî merkezê Kobanê ra verî hêrişê dewanê ci kerdbî û vat: ''Kobanê binê ablûqaya cergan de bîyê.  DAÎŞî plan kerdêne ke Kobanê ra heta paytextê Sûrîye Şamî îşxal bikera. Ma bi çekanê xo yê şenikan vera DAÎŞî şer kerd û xo ver da. DAÎŞî bi xeylêk cergan hêriş kerdêne. O çax Vakurê Kurdîstanî ra şarê ma sînoran ra derbazê Kobanê bi. Ma pîya, şerwananê xo reyde Kobanê pawite. 

O çax ez û şehîd Dogan ma pîya dewa Helincê de vera DAÎŞî şer kerdêne. Ma Kanîya Kurdan de cephe de cagirewtêne. 134 rojan Kobanê bi hawayêkê bêhempayî xo ver da. Ma Kobanê destê DAÎŞî ra bi yewîya şarî û felsefeya Rayber Apoyî xelisnaye. Ma deyndarê şerwananê PKKyî yê. Seba ke Kobanê hetê gerîlayan ra pawîyaye, ma zî do heta peynî gerîlayan bipawê. Kobanê ra dima Minbic û Reqa zî ameyî xelisnayene. Ma soz dabi ke Kobanê nêdê. Ma bi azadkerdişê Kobanê zî no soz ard ca.''

Xelîl Osman Remêyo ke bi nameyê Apo Nemirî şinasîyeno vat: ''Ez dewa Borêzî ya Kobanê de lingê xo ra birîndar bîya. Tedawî ra dima mi narey verê xo da dewa Kendalî. Mi çar domananê xo reyde Kobanê de şer kerd. Mi o çax domananê xo ra xebere zî nêgirewtêne. Şerê Kobanê hîkayeyêke bîye ke ez nêeşkena pênase bikera.  Kobanê de xeylê embazê ma birîndar bîyî, şehîd bîyî. Mi her hela şerî de vatêne 'Ya ez do şehîd biba yan zî ma do pîya Kobanê bixelisnê. Şerê Kobanê zaf giran bi. La mi bi îradeyî têkoşîn kerd.

Ma xêrê ciwananê kurdan ra nê şerî de ser kewtî. Mi vatbi ke ez do Kobanê nêda. Û mi nêdaye. Mi xeyalê xo ard ca.''