Abdûlazîz Acir û Fethî Şahîn her di embazê ke 9 serre cuwa ver Nimajê Îneyî yê Sivîlî de yewbînan şinasnayo û bîyî embaz a roje ra nata zî tim pîya şinê çalakîyan. Her di zî roja 44'ine ya Nobeta Demokrasîyî verba qeyûman de cayê xo girewt.

Aciro ke dewa Hetbî ya qezaya Dêrikî ya Mêrdînî ra yo serra 1938 de ame dinya û serra 1989 de semedê meseleyanê ekonomîkî ra mecbur mend koçê Amedî kerd. Acirî Mêrdîn û Amedî de 45 serran şîwanîye kerde û 28 serre ra nata têwgêrayîşê sîyasetê Kurdî de ca gêno. Nê rojan de zî Acir nobeta demokrasîyî verba qeyûman de seba îradeyê şarê xo têkoşin dano.

Acirî ard ziwan ke seba ke tewrê çalakîye bîyo şay o û wina dewam kerd: "Lejêkê verba îrade û heqanê Kurdan esto. Ça de zulm esto ma uca  wurzenê payan ser. Hêzo ke verba nê lejan de vindero hêzê şarê Kurdî yo. Ma weçînayîşê 31'ê Adare de qeyûmî tîya ra pak kerdî. Êyê ke ma pê îradeyê xo weçînayê ameyî. Ma 44 rojan ra nata verba xespkerişê îrade yê ma xo ver danê. Hînî ma dewlete ra bawer nêkenê. Quran de vano ke Eke cayêk de zulm estbo uca xoverdayîş zî estbo. Ez heta peynîya cuya xo seba heq û edalet têkoşîn dana. Ma heqdar ê û do ser bikewê. Qeyûmî dizdî û munafiqî ya."

Acir ê kesan ra yo ke reya verêne tewrê Nimajê Îneyî yê Sivîlî bîyo. Acirî na babete de wina vano: "Ez verba camîyan nîyo la ez nêşino camîyanê dewlete ke dewlete tede îdeolojîyê xo bi zorî pêşkêşê ma kena. Taxa ma de îmamê ma esto û ma şinê camîyê xo. Ez qet peyê îmam ê sîstemî de saf nêgêno. Camîyan de şarê Kurdi rê heqaret kenê, seba Erdogan û Ataturkî dûa kenê. Çira ez seba kiştoxanê şarê ma dua biko? Erdogan tim zûran keno, Kurdan rê heqaret keno, munafiqîye keno. O dînê ma seba karê xo xebitneno. Pê nê têgêrayîşanê xo kiş o ke verba dînê ma de yo. Ma bêalternatîf nîyê. Ma bihêz ê. Ganî şarê Kurdî wayîrê heqanê xo veje. Wa tewrê çalakîyan bibe, wurze payan ser û dew û qeza û şaristanan de xo bi hewayêkê birêxistine bêrê pêser. Eke ma amayoxê domananê xo xo rê derd kenê ganî ma vengê xo vejê. "

'Qeyûm Dizdîye û Ruşwet o'

Fethî Şahîn zî dewa Dêlgurî ya qezaya Çinarî ya Amedî de ame dinya û 12 serre cuwa ver koçê Amedî kerd. Şahînî heywankarîye û zîret keno û debarê keyeyê xo pê şîwanîye keno. Şahîn vat ke cuya dewe ra zaf hes keno la mecbur mendo ame Amed. Dimayê ke lajê apî yê ey hetê Hîzbullahî ra ame qetilkerdene keyeyê xo bar keno Sûrê Amedî.

Şahîn embazê xo Acir reyde her roje yenê Nobeta Deomrasîyî ke Cehdeyê Lîseyî yê Amedî de ameye destpêkerdene. Şahîn vano ke her roje serê sibayî awil nimajê xo keno, dima embazê xo Abdûlazîz Acirî rê telefon keno û saete 11.00 de pîya yenê Cehdeyê Lîseyî û tewrê Nobeta Demokrasîyî benê.

Şahîn derheqê xespê qeyûman de wina vat: "Dest naye îradeyê şarî ser. Ma dî ke qeyûman her ca de dizdîye kerde. Wextê HDP'yî de şaredarîye şaredarîya şarî bî. La nika dormeyê şaredarîye ame girewtene. Şar nêeşkeno şore uca. Ma heta çi wext bêveng bimanê? Ma heqanê xo rê gêrênê. Qeyûm ruşwet û dizdî yo. Ez 72 serre yo. Eke qeyûm 72 serra bine zî tîya  bibo ez zî tîya  ya. Heta peynîya cuya xo  ez do wayîrê îrade yê şarê xo bivejo. Wexto ke qeyûm ame tayînkerdene ez û Abdûlazîz ma ameyî tîya. Polîsan hêrişê ma kerd. Ma înan ra nêtersenê. Her roje ma Cehdeyê Lîseyî de bêrê pêser. Heta ma bêveng bimanê, ê do hêrişê ma bikê. Ganî ma verba zulmî sêneyê xo bikê sey mertalêk."