Polîsanê tirkan erwo serê sibayî eşt keyeyan ser û xeylêk sîyasetmedarê kurdî û aktîvîstî destbend kerdî. Sebebê destbenkerdişan seba ke qerarê nimiteyîye yê dosya esto nêame zanayenê.

Endama Meclîsê Mayanê Haştîye yê  Amedî Havva (Rabîa) Kiran (63) zî mîyanê kesanê ke ameyî destbendkerdene de ya. Kirane grûba rîskî ya vîrusê Korona de ya û reyna nêweşîyê ci yê zerrî û tansîyonî estê.

18 kesê ameyî destbendkerdene nameyê înan wina yê: Endamê ronayaxî yê Komeleya Cinîyan a Rosa Narîne Gezgor û Ayla Akat Ata, sereka Komeleya Cinîyan a Rosa Adalete Kaya û Îdarekara komele Fatma Gultkîn, aktîvîstê TJA Gulcîhane Şîmşek û Zelale Bîlgîn, hemsereko verên ê pêroyî yê Partîya Herêman ê Demokratîkan (DBP) Mehmet Arslan, endama Heyetê Rayberdişî yê Merkezî yê Partîya Demokratîke ya Şaran (HDP) Ozleme Gunduz, hemserekê HDPyî yê Yenîşehîrî Remzîye Sizici û Kasim Kaya, endamê HDPyî Mehmet Alî Altinkaynak, sîyasetmedaro kurdî Celal Yoldaş, Nazîle Tursun, endamê Meclîsê Şaredarîya Baglarî Huseyîn Harman û Gunele Aslan, endamê Meclîsê Şaredarîya Bajarê Pîlî ya Amedî Selîne Coşkun, endamê Meclîsê Şaredarîya Yenîşehîrî Nevrîye Çur û endama Meclîsê Mayanê Haştîye yê Amedî Havva Kiran.