Tecrîdê serê Rayberê Şarê Kurdî Abdullah Ocalanî dewam keno. Dimayo ke grevê vêşanîye ke rayberîye  Leyla Guvene de ame destpêkerdene û 8 kesan cuya xo vîne kerde hukmatî peyser game eştebî û tecrîd amebi şiktine. La ewro tecrîd reyna bi metodanê cîyayan dewam keno. Ne keye ne zî avûkatê Ocalanî eşkenê ey de pêvînayîş virazê. Mayê Haştîye ke demê grevê vêşanîye de rolo tewr gird kay kerd, tim kuçeyan de vengê domananê xo yê xoverdayoxanê ke zîndanan de yê dayenê eşnewitene wazenê ke seba ke reyna ê rojan rê mero agêrayene tecrîd cade bi temamî bêro wedartene.

Êdî Bes o!

Mayan ra Mabûle Dîkmena ke lajê aye 103 rojî grevê vêşanîye de mend ard ziwan ke nika rewşa lajê aye Mehmet Saîtî hol a û va: ’’ Xora ez mayêka nêweş û pîr a. Wextê grevê veşanîye de ez deslab pîr bîya. Domanê ma helîyayî qedîyayî. Ma peyê waştişê domananê xo de vindetî.  Ewro zî ma vindenê la ma tersenê. Ma va qey tecrîd qedîya, la dewam keno.  Heta çi wext do bêro domnayene. Edî bes o! Ma mayî wazenê ke no tecrîd cade bêro wedartene.

Ez Ne Lajê Xo Ne Zî Ocalanî Caverdena

Maye Nezahat Kaçare zî vist vîrî ke lajê aye Îlhan Kaçaro ke 1’ê Adare de dest bi grevî kerd û heta peynî dewam kerd 25 kîlo vînî kerdî û  demê weşbîyayîşî bi zehmetî ravêrna û va: ‘‘ Nê şarî se kerd şima ke şima wina ci rê ezîyet kenê. Ma tena wazenê wa tecrîdê serê Rayberîya me bêro wedartene û seba ke domanê ma yê ke semedê fîkranê xo yenê hepskerdene hema reyna dest bi grevî nêkerdo wa serbest bêro veradayene. Ez ne lajê xo ne zî Ocalanî caverdena. Wa hînî naye fam bikerê û tecrîd temamî de wedarê.‘‘

Haştîye Ya  ke Birêz Ocalan Wazeno Ma zî Aye Wazenê

Sanîye Dûmana ke pîya bi lajê xo kewtîbî girevê vêşanîye vera tecrîdî razînêbîyayîşê xo ramot û wina dewam kerd: ‘‘Na rey çalakîye têna zîndan de nêmanena, naye herkes zano.  Hema netîceyî zaf xidar nêbîyî wa na xeletî ra peyser agêrê. Ma ne polîsan ra tersenê ne zî sey domananê xo tepiştiş ra. Ma sey Mayanê Haştîye her ca de her hele haştîye wazenê. Ewro haştîye ya ke Birêz Ocalan wazeno ma zî aye wazenê.‘‘

Ganî Berpirsîyarî Na Xeletîye ra Peyser Agêrê

Latîfe Soylemeze zî waşt ke tecrîdê serê Ocalanî cade bêro wedartene û va: ‘‘Domananê ma semedê wedartişê tecrîdî ganê xo da. Eke tecrîd wina dewam bikero do nêzdî ra çalakîye hîna bitesîr giranî bêrê viraştene. Ma mayî sey vizêrî ewro zî kişta domananê xo de yê. Ganî proses nêro a nuqta. Ez tîya ra vengê kena heme berpirsîyaran û hukmatî  no rayîro ke teqîp kenê xeleto, ganî na xeletîye ra cade peyser bêro agêrayene.‘‘