Grevê vêşanîye yê bêdem û bêagêrayîşî yê ke zîndananê Kurdistan û Tirkîya de seba ke tecrîdê serê Rayberê Şarê Kurdî Abdullah Ocalanî wedarîyo ameybî destpêkerdene kewtî roja 70’ine. Tepişteyo bi nameyê Abdullah Kurt ke no 26 rojî yo Zîndanê Tîpê H’yî yê Dîlokî de grevê vêşanîye de yo qezaya Ortaklar a Aydinî de ameyo dinya û lîse heta sinifa yewine wenda.

Kurto ke xeylî reyan ameyo destbendkerdene, 2009 de ame girewtene û ê şirawenê Zîndanê Îzmîr-Kirikkaleyî. Ûca dimayo ke serrêk tepişte maneno, yeno veradayene. La seba ke cezaya ci yena tesdîqkerdene ancî erzenê zîndan. Na rey Zîndanê Tîpê D’yî yê Amedî de maneno, dima ra surgunê Zîndanê Tîpê T’yî yê Dîlokî yeno kerdene û hema kampuse de dima ra surgunê Tîpê H’yî yeno kerdene.   

KEYEYÊ ÎNAN RA TEPIŞTEYÊ BÎNÎ ZÎ BÎYÊ

Maye Nazîfe Kurte vana Abdullah Kurt pêro pîya 15 serrî yo ke zîndan de mendo û domanîya lajê ci şertanê giranan de ravêrta. Kurte vana ke Abdullah hewna ke 5 mengî bîyo pîyê ci ameyo tepiştene û gama bîyo 11 serre pîyê ci zîndan ra vejîyayo.

Kurte qsieykerdişê xo wina domna: “Her çende domanîya Abdullahî giran ravêrte zî o bi nê xemgîn nêbi. Domanêk zaf baş o, şîyêne kamca her kesî ê ra hes kerdêne. Seba ke mi o zaf nêberdêne zîndan ê pîyê xo nas nêkerdêne. Rojêk gama ke pîyê ci zîndanê Çanakkaleyî de bi Abdullahî vat, ‘mayê no kam o?’ Mi zî vat pîyê to yo. Wina hêdî hêdî ê pîyê xo nas kerd. 

PÎYA BI LAJÊ XO YÊ QIJKEKÎ AMÎ TEPIŞTENE

Kurte vat, “Xora Kanûn a 2010’î de ez zî zîndanî ra vejîyaya. Seba ke ez lajê xo yê qijkekî Harûnî dir tewrê eşkerayîya çapemenîye bîbîya, 7,5 mengî ez Zîndanê Bergama yê Îzmîrî de menda.

Seba ke înan tim eştêne serê keyeyî ma mecbûr mendî ke 2011 de koç bikerê bi Amedî. Abdullah zaf kewt nê ver. Çend mengan dimayê vejîyayîşê mi ra Abdullah ame tepiştene. Dimayê tepiştişê ê ra pîyê ci reya dîyine ame tepiştene û Zîndanê Amedî de bi.”

 ‘DOMANÊ MA ÇALAKÎYA XO DE HEQDAR Ê’

Kurte dewam de nê vatî: “Ê vat ke ma zaf qerardar ê û heta peynîye do çalakîye bidomnê. Ard ziwan ke çalakîya xo ra zaf kêfweş o û heta tecrîd biqedîyo do dewam bikero. Halê êyê weşîye rind nêbi. 4 kîloyî dabî. Sere de Leyla Guvene rê her kesî rê silamê ci estbî. Vat ke seba şikitişê tecrîdê kewtê na çalakîye û heqdar ê. Ganî heme merdimanê ke na çalakîye şinawita destê xo bidê serê wijdanê xo.” 

VENGDAYÎŞÊ SEBA HÎSDARÎYE

Kurte peynîya qiseykerdişê xo de nê vatî: “Leyla Guvene 108 rojî yo, êyê ke zîndanan de yê zî 70 rojî yo ke grevê vêşanîye de yê. Grevê vêşanîye yê tayê cayanê Ewropa zî kewto roja xo ya 90’ine. Nê heme domanê ma yê. Ganî ma heme hîsdar bê. Ganî ma înan rê wayîr vejîyê. Ez veng dana her kesî ke ma tena meverdê. Eke zîndanan ra tabûtêk vejîyo seba ma manaya çîyêk nêmanena.

Ma veng danê hukmatî ke peynî ro tecrîdî bîyaro. Gama ke domanê ma ûca helênê ma zî tîya helênê. 317 kesî tay nêyê. Na hûmare her ke şina vêşî bena. Domanê ma xo ra eştê zîndanan, ser de zî înan ser o tecrîd bica anê. Ganî tecrîd tavilî bêro wedaritene.”