Ame zanayene wexto ke dewa Goktepe ya qezaya Magîrdî ya Dêrsimî de Oktay Ero ke vizêr serê rayîro tewr pîl ra şîyêne duşto bîn ke bigêro a dewa xo wesayîtê zirxinî yê leşkeran da piro. Rîyê pirodayîşî ra Erî ûca wefat kerd. Cenazeya Erî seba muameleya otopsî ameye erşawitene bi Meletî.

Babîyê Oktayî Cebraîl Erî vat, qeza serê rayîrê duzî de bi, seba ke wesayîtê leşkerî lez ameyêne aye ra dayo lajê ey ro û va: ‚‘‘ Ma cayê qezayî de 3 seatî pabeyê dozgerî vindertî. Cenaze dimayê cigêrayîşê cayê qezayî ame erşawitêne qezaya Mazgîrtî. Ûca de ambulans nêda ma. Dima ke selahîyetdarî kewtî mîyan, ambaluns da ma. Uca ra ma cenaze ard Meletî. Ser rayîro tewr pîl o duz de senî nêşikîyê lajê mi bivînê? Ez do gerreyê kiştoxan ê lajê xo biko." Cenazeyê Oktay Erî siba do dewa Çîmenlî de bêro definkerdene.

10 Serran de 36 Kesan bi Pirodayîşê Wesayîtanê Zirxinan Wefat Kerd

Kurdistan de wesayîtê zirxinî hema zî gan gênê. Amed de 11'ê Êlule de wesayîtê zirxinî yê polîsan dabi Efe Tektekîn û Tektekîn merdibî. Goreyê Komeleya Heqanê Merdiman (ÎHD) mabênê 2008 û 2018 de  Kurdistan de 63 reyî wesayîtanê zirxinan da hemwelatijan ro. 16’ê înan domanî 36 kesan nêtîceyê nê pirodayîşan de wefat kerd.