Cenzayê şehîdan erey dîyenê keyeyanê ci. MEBYA-DERî vera mesele nêrazîbîyayîşê xo mojna. Hemsereka MEBYA-DERî Yuksele Almas Amed de bînaya dezgehî de kombîyayîşê çapemenîye de qisey kerd û îfade kerd ke keyeyan ser o tedaya psîkolojîk û sîyasî esta.

Almase da zanayene ke rixmo ke keyeyî  cenaza teşhîs kenê seba testê DNA bi serran pawenê. Almase vat: ''Ge ge zî hêzê dewleye keyeyan rê teda kenê û vanê 'Ganî şima cenazaya xo berz bikerê berê. Menga vîyarte de keyeyêk neçare mend ke cenazaya xo Wanî ra heta Erziromî bi wesayîtê xo yê şexsîyî bero.Her cayê kontrolî de zî cenaza bi saetan yena vindartene. Cenazayanê ma rê hûrmet nêkenê û keyeyan rê gef wanenê. Ganî nê kerdişanê xo yê xiraban ra fek vera bidê.

Hemserekê MEBYA-DERî Şeyhmus Karadagî zî eşkera kerd ke cenazayî keyeyan ra bêxeber goristananê bêkesan de yenê definkerdene. 

Mehmet Zekî Dago ke lajê ci serra 2013î de Bedlîs de şehîd bi vat: ''Serra 2017î de cenazayê domananê ma berdê Dezgehê Tipê Edlîyî yê Îstanbulî û hişta rayîrî de defin kerdbi. Domanê ma bêwayîr ê. Ma dadî û babîyê înan ê. Çira vanê bêkes ê? Ma sey keyeyan wazenê ke wa bi lezî netîceyê testanê DNA eşkera bibê.''