Amed de  vizêr Komeleya Cigêrayîşê Ziwan û Kulturî yê Mezopotamya verê banê xo de bi waştişê perwerdeyê bi ziwanê dayîke eşkerayîye daye. Partîya Herêmanê Demokratîkan (DBP), Têgêrayîşê Cinîyan ê Azadan (TJA), Sendîkayê Kedkaranê Perwerdeyî û Zanîstîyî (Egitim Sen) Dayîke Haştîye û temsîlkarê rêxistinanê sîvîlan tewrê eşkerayîye bîyî.

Eşkerayîye de pankartê “Bila zimanê kurdî bibe zimanê fermî û perwerdehiyê" ame akerdene û sloganê sey "Zimanê kurdî rûmeta me ye" ameyî vatene.

Hemseraka DBPyî ya Amedî Sultane Yaraya ke eşkerayîye de qiseykerdişo kilm kerd, bale ante zextanê vera ziwanê kurdkî ser û vat ganî her kes her ca de kurdkî qisey bikero.

Hemsereka MED-DERî Şukrane Yakuta ke derheqê babete eşkeraye daye, vist vîrî ke serra perwerde û musayene dest pê kena û vat: ''Qijê kurdan reyna raştê polîtîkayanê asîmîlasyonî yenê. Ziwanê qijan ê keyeyî û mektebî seyyewbînî nîyo. Qijî mabênê wird ziwanan de bêziwan manenê.  Coka tay keyeyî qiseykerdişê kurdkî caverdenê, qijanê xo dir tirkî qisey kenê. Pîya bi nêyî hem asîmîlasyon hem zî oto-asîmîlasyon her roje zêdîyeno û ziwanê kurdkî bi çînbîyayîşî rî bi rî maneno. Tirkîya de polîtîkayê asîmîlasyonî wextê ronayîşê ci ra est ê. Komara Tirkîya ziwan û kulturê xo serê çînkerdişê ziwan û kulturanê bînan û înkarkerdişê şaranê bînan de nayo ro.''

Şukrane Yakut wina dewam kerd: ''Heqê qijanê kurdan est o ke bi ziwanê xo yê dayîke perwerde bivînê. Tirkîya ganî goreyê pêkerdişanê mîyanneteweyî têbigêro. Ganî astengîyê verê ziwanê kurdkî bêrê wedaritene. Ma sey MED-DERî wazenê wa kurdkî bibo ziwano fermî. Waştişê perwerdeyê kurdkî waştişanê kurdan ê tewr bingeyênan ra yew o. Perwerdeyê bi ziwanê dayîke muhîm o. Ziwanê ke mekteban de ziwanê perwerdeyî nêbê nêeşkenê aver şirê. Hetê pedagojîkî ra zî qijê ke ziwanê xo yê  dayîke hol nêmusenê xo peyde ancene.  Cuyeya komelkî ra tersenê. Qijê kurdan Tirkîya de perwerdeyê bi ziwanê dayîke mehrum manenê ke heqê înano tewr bingeyên o.''

Yakute veng da sîyasetmerdaran, şar û keyeyen û vat: ''Kurdkî medê kişt, bi kurdkî qisey bikerê. Ziwan û kulturê xo ra dûrî mekewê.Ziwan û kulturê ma tarîxê ma yo, vîrê ma yo. Ma ziwanê xo cuyeya xo ya rojane de bişuxilnê. Bi qiseykerdişî ma eşkenê ziwanê xo aver berê. Ma sere de zî veng danê dewlete, astengîyanê verê kurdkî wedarê. Wa kurdkî bibo ziwano fermî. Problemî bi seyyewbînîye yenê çareserkerdene.''