Qezaya Cizîre ya Şirnexî de bi tewrbîyayîşê dezgehanê ziwan û kulturî yê Kurdîstan û Tirkîya dezgeheqê ziwanê kurdkî de deklarasyon  ame weşanayene.

Deklerasyon de bale ameye antene serê xebatanê ke do seba pawitişê ziwanî û averberdişê têkoşînê ci bêrê kerdene. Temsîlkarê dezgehanê ziwan û kulturî û Parlamentera DEM Partî ya Şirnexî Newroze Uysal û xeylêk kesî tewrê eşkerayîye bîyî.

Eşkerayîye de pankartê ''Ma kurd ê, ziwanê ma kurdkî yo û ma do kurdkî biciwîyê'' ame akerdene û dovîzê sey ''Ziwanê ma estbîyayîşê ma yo'' Ez kurd a perwerdeyê kurkdî wazena'', ''Ziwanê ma anorê ma yo'' ameyî kiriştene. Şar bi dozîvan Komeleya Ziwan û Kulturî ya Birca Beleke ya Cizîre ra heta parka ke tede eşkerayîye ameye dayene rayra şi. Metnê deklarasyonî yo ke hetê dezgehanê ziwanî ra ame hazirkerdene hetê hemserekê Komeleya Ziwan û Kulturî ya Birca Beleke Cahît Akilî ra ame wendene.

Deklarasyon de nê ameyî vatene: ''Hêrişê vera ziwanê kurdkî zî pabesteyê tecrîdê serê Rayberê Şarê Kurdî Abdullah Ocalanî yê. Dewrê peyênî de vera ziwan, kultur, huner û govneda kurdan hêrişî ameyî kerdene û xeylêk kesî ameyî destbendkerdene.  Kenê ke Tirkîya de ziwanê kurdan binate ra wedarê.  Ziwan kitabanê bimbarekan de sey ayetê Hûmayî ravêreno. Coka hêrişê vera ziwanî sûcê merdimîye yê. Birêz Ocalan bi vatişê 'averşîyayîşê komelî basteyê averşîyayîşê ziwanî yo. Ziwan bedeno wayîrê bedenê xo bivejîyê' bale anceno muhîmîya ziwanê dayîke ser. Ziwan cuye bi xo yo.  Coka pawitiş û averşîyayîşê ziwanê kurdkî sere de şarê kurdî berpirsîyarîya heme şaran a.  Kurdkî xeta tewr muhîme ya kurdan a. Ganî sey ziwananê bînan ê dinya kurdkî zî bibo wayîrê heqanê xo. Coka ganî kurdkî bibo ziwano fermî bibo wayîrê statuyî.''

Akili ard ziwan ke ê do semedê pawitişî kurdkî têkoşînê xo xurtêr bikerê û derheqê xebatanê ke do bikerî nê vatî: ''Ma do her ca yo ke kurdî tede ciwîyenê derheqê muhîmîya ziwanî de panel, seminer, form, komxebeta, konferans, festîvale, semposzyum, eşkerayîye çapemenîye, rayraşîyayîş, mîtîng û xeylêk programanê bînan ê demokratîkan bikerê. Ma do vera her qeyde hêrişan bivejîyê û bi xebatanê cîya cîyayan kurdkî bikerê ziwanê sîyasetî, ziwanê dezgehanê kurdan û ziwanê her warê cuye.

Na çarçewa de ma veng danê heme partîyanê sîyasîyan, şaredarîyan, sendîkayan, platforman, dezgehan, kurdan, welatperweran, şorişgêran, demokratan, sosyalîstan û bitaybetî şarê azadîwaştoxî hewtî ra heta hewtayî bi seferberîye ma wayîrê ziwanêx o bivejîyê.''