Wan de mîyanê na serre de 108 multecîyî sînorê Wan û Îranî de merdî. Tewr peyên 27ê hezîrane de keştîyêka ke tede 100 multecîyî estbî cûm bîye binê awe û înan ra cenazayê 7 kesan ameyî dîyene û 93 kesî zî hema zî vînbîyaye yê.

Serekê Şubeyê Wanî yê ÎHDyî Murat Meletî tarjedîya multecîyan ser o qisey kerd û ard ziwan ke multecîtîye çare nîya. Meletî vat: ''Ganî pêro dewletî wayîrê koçber, multecîyan bivejîyê û heqanê binyeyîyan ê merdimîye bipawê.  Di serranê peyênan de Gola Wanî de xeylêk keştîyî cûm bîyî û xeylêk multecîyî merdî. Gola Wanî seba ma cenet o la ma nêwazenê no cenet bibo gorê multecîyan. Tirkîya multecîyan sey çeka bazarîya sîyasî xebitnena. Heyf o ke ma erjanê merdimîye ra dûrî kewenê. Neteweyê Yewbîyayeyî wezîfeyê xo tam nêanê ca. Tim qala demokrasî û heqanê merdiman kenê la pratîk de cîya têgêrenê. Keda multecîyan yena diznayene, erzanî yenê xebitnayene. Ganî her kes biewnê multecîtîye û erjanê xo yê merdimîye ser o newe ra vinderê.''