Torra Heqanê Merdiman a Kurdîstanî ya ke Rojhelatê Kurdîstanî de xebitîyena, derheqê binpaykerdişanê heqan ê vera kurdan de raporê xo yê mabênê 21ê kanûne-21ê çeleyî weşana.

Rapor de dîya zanayene ke mîyanê 30 rojanê peyênan de netîceya hêrişanê hêzanê Îranî de 4 kolberî ameyê qetilkerdene, tewr tay 41 kolberî birîndr bîyê û kolberêk zî kendalî ra kewto war. Ame parekerdene ke sînorê Bîyarî yê Başûrê Kurdîstanî de 4ê ci domanî 9 kolberî raştê îşkenceyê giranî yê hêzanê Îranî ameyê û dima vera dîyayê.

Rapor de ame dîyarkerdene ke dewleta Îranî 34 kurdî darde kerdê û 11 kurdê tepişteyî zî gefê dardekerdişî de têrî yê.

Goreyê raoırî 45 aktîvîstê kurdî hetê dewleta Îranî ra tepişîyayê û nînan ra aktîvîste Ruîya Heşmetî seba ke mecburîyetîya seregirewtişî red kerde ci rê cezaya 74 qamçîyan dîyaya.

Hetê bînî ra dewleta Îranî bi bahaneya ke tewrê çalakîyanê 'Jin, Jiyan, Azadî' bîyo ciwanê bi nameyê Muhammet Qubadlu Zîndanê Qizilhîsarî de darde kerd.  Heta nika 9 kesî seba ke tewrê çalakîyanê 'Jin, Jiyan, Azadî' bîyê hetê dewleta Îranî ra ameyî dardekerdene.