Rewşa ekonomî ya Tirkîya her roje bena xirabêr. Muhakemekerdişî ra heta îdareyî, polîtîkaya teberî ra heta mesrafanê qesre xeylêk çîyî kokê ekonomî anê. Roniştoxanê Sûrî yê Amedî babete ser o qisey kerd.

Esnaf Şahabettîn Ugur (66)o ke 42 serrî yo Sûr de esnaf o pare kerd ke ey cuya xo de krîzêko winasên nêdibi û vat: ''Serê sibayî ra heta şanî çîyêk nêno rotene. Verî ra cara krîz estbî la wextê janî de krîz zêdîya. Her ke şino xizanîye zêdîyena. Mesrafanê qesre kokê ekonomî ard. Ma bêçare yê. Her kes kewt binê deynan.''

Esnaf Şaban Menteş (36) vat: ''Menga Remezanî ameye la ma nêeşkê çîyêk bihêrînê. Nê hukmatî her kes kerd xizan la terefgîrê xo kerdî zengîn. Xora wextêkê dergî ra nata krîz esto. Dewlete hetkarîya ma nêlena. Ma hînî nêeşkena faturayanê xo zî bidê.''

Orhan Baga (38) vat: ''Deynî zêdîyayî. Ma sey esnafan zaf zehmetîyan ancenê. Zafê esnafan dikanê xo girewtî. Dewlete cara tewr hetkarîya ma nêkena. Tim merdiman mexdûr kena. Esnafî zî vera nê neheqîyan vengê xo nêkenê.''

Ramazan Ekinci (55) vat: ''Destpêkê wisarî de ez kerengan arê dana û ana bazar de roşena.  Bawer bike çîyêk nêkeweno destê mi. Rojêke merdim 40 TL qezenç bikero pere yo? Kîra esto, faturayî estê. Halê ma pêrîşan o. Na senî cu ya.''

Ahmet Onaran vat: ''E nêeşkena pê meaşê xo yê teqawutî debarê xo bikera. Meaşê mi 2 hezar û 400 lîra yo. Nêmeyê ci şino kredî. Çayxaneyêkê mi estbî la o zî jan de qefilîya. Nika ra pey ez nêzanena se bikera.''

Yusuf Erdal (66) vat: ''Qaşo ez teqawut bîua la de biewne halê mi.  Dewlete her ca ra diznena û wena. Nê hukmatî merdimî kerdî xizan. Ez kîra de ya senî eşkena debarê xo bikera. Wile bîle ge ge ez nêeşkena faturayan zî bida. Menga Remezanî ameye ma nêşîyî bazarî. Çunke pereyê ma çin o.''