23ê sibata 2020î de bi girdîya 5.9î merkezê ci qezaya Elbakî Wan Wan de erdlerz qewimîya. Erdlerzî ra dima taxanê Elbîs, Elezî, Qîratî, Qaşqol û Xanîkî yê Elbakî de texrîbatî virazîyabî. Erdlerz de 10 kesan dinyaya xo bedilnaye, 54 kesî birîndar bîyî, 50 banî û 300 axûrî rijîyayî û 4 hezar 900 banî zî texrîb bîyî. 

Erdlerzî ra dima selahîyetdaranê dewlete soz dabi ke ê do mexdûran rê TOKÎyan virazê la no soz nêame caardene.

Mexdûrê erdlerzî derceyê binê sifirî 20 de teber de manenê û xeymanê xo seba heywanan şuxilnenê. 

 Abîdîn Demîro ke erdlerz de keye û axûrê ci rijîyayî vat: ''Zimistan o ma pêrîşan bîyî. Heywan doman û ma pîya heman cayî de manenê. Înan soz dabi ke ma rê axûr û keyeyan virazê la sozê xo nêard ca. Dewlete têna konteynir û xeyme da ma. Ma axûr û keyeyanê xo wazenê.'' 

Aycane Demîr da zanayene ke erdlerzî ra dima bara cinîyan zêdîyaye û vat: ''Înan ma rê hetkarî nêkerde û do nêkerê. Ma herinda keyeyê xo yê rijîyayeyî de fîrket û çamurî ra odayêke viraşte. Hema zî erdlerzî qewimîyenê. Ma tersenê.'' 

Mihyeddîn Başkurtî vat: ''Taxe de 110 keyeyî estbî  40 keyeyî mendî. 70 keyeyî neçare mendî ke koçê Wanî bikerê. Înan zî heywanê xo pêro rotî la wazenê abigêrê dewanê xo. Ma nê zimistanî de nêeşkenê konteyniran de bimanê. Mexdûranê erdlerzê Xarpêtî rê keyeyî dîyabi wa ma rê zî keyeyî virazîyê.''