Mexmûr de şar vera hêrişan vejîya kuçeyan

Mexmûr de şar vera hêrişê dewleta tirke yê SÎHAyan ver bi Ofîsê Neteweyanê Yewbîyayeyan rayra şi.

Wesayîtê Hewayî yê Bêmerdim û Biçeke yê dewleta tirke ewro Kampa Multecîyan a Şehîd Rustem Cûdîyî (Mexmûr) de da wesayîtêkî ro, kesêk birîndar bi.

Ciwano ke birîndar bi Nêweşxaneyê Şehîd Hogirî de yeno tedawîkerdene. Bado ke hêriş ame eşnawitene şarê kampe cayê qewimîyayîşî de ame têhet. Şaro ke verê nêweşxaneyî de ame pêser vera hêrişî ver bi Ofîsê Neteweyanê Yewbîyayeyan (NYyî) rayra şi. Verê ofîsê NYyî de eşkerayîye ameye dayene. Eşkerayîye hetê Hemsereka Meclîsê Şarê Demokratîkî Fîlîze Budak ra ameye wendene.

Budake vat: ''Ewro dewleta tire ya îşxalkere hêrişê xo yê bêehleqî yê vera Kampa Mexmûrî rê dewam kerd. Şarî bi têkoşînê xo rîyo leymin ê dewleta tirke vet meydan.  Heta azadîya fîzîkîye ya Rayber Apoyî û ronayîşê netewa demokratîke têkoşînê ma do dewam bikero. Ewro qicê ma Avaşîn de pê çekanê kîmyewîyan yenê qetilkerdene. Qicê ma vera tank û topanê dewleta tirke tunelan de û şikeftan de têkoşîn kenê. Se beno wa bibo ma do tim payra bi û têkoşîn bikerê. Êyê ke wazenê têgêrayîşê azadîye û kurdan bin bifînê ma do hesabê înan bixeripnê û meverdê xeyalê înan bêrê ca.''

Eşkerayîye bi slogananê sey  “Bijî Serok Apo”, “Bijî Berxwedana Mexmûr”, “Bimre îxanet”, “Tolhildan”  qedîyaye.