Kampa Multecîyan a Şehîd Rûstem Cûdîyî ya Mexmûrî de serrgêra 39. ya Hemleya 15ê Tebaxe beşdarîya enternasyonalîstan bi şayîyêke ameye fîrazkerdene.

Şayîye de Hemserekê Îdareyê Meclîsê Şarî yê Mexmûrî Yusuf Karayî qisey kerd û girîngîya 15ê Tebaxe viste vîrî. Karayî vat: ''Vera mezgê îşxalkeran 15ê Tebaxe de guleyo verên erzîya. Kurdî û estbîyayîşê kurdan bi Hemleya 15ê Tebaxe ameyî pawitene.Ewro pêro destkewteyê kurdan berhemê 15ê Tebaxe yê. Na roje Rayber Apoyî û pêro şarê ma rê fîraz biba.''

Qiseykerdişî ra dima sînevîzyonêk ame mojnayene, kayê tîyatroyî 'Jîn im Jiyan im' ame kaykerdene. Şayîye de hunermendî vejîyayî sehne ser û înan reng û coş da şayîye.

Hetê bînî ra komêka enternasyonalîstanê panc welatan zî tewra şayîye bîye. Nê enternasyonalîstan mesajê 15ê Tebaxe da û vat: ''Ma 5 hemwelatîyê Ewropa ameyê tîya ke na roje fîraz bikerê. Seke Rayber Apoyî vatbi 'Vera sîyasetê înkar û îmha, alternatîf 15ê Tebaxe bibi.' Seba ney erk û mesuldarîyê ma yê ke ma fikranê Rayber Apoyî vila bikerê.''

Şayîye pê govendan qedîyaye.