Înîsîyatîfê Rayber Ocalanî rê Azadîye yê Erebî çarçewaya Hemleya Azadîye de 24ê tebaxe de bajarê Kahire yê  Misirî de panalêk organîze kerd.

Hetkarê Serekê Merkezê Cigêrayîşanê Stratejîk û Sîyasîyan ê Ereban Rojnameger Mecdî Deqaq, Dr. Muxtar El Xebaşî, Prof. Mihemed Rifat Îmam, akademîsyenê tarîxê hemdemî û tekîlîyanê mîyanneteweyî û Endamê Konseya Tekîlîyanê Teberî yê Misirî Demhur Bemser, Sekreterê Pêroyî yê Partîya Sosyaliste ya Misirî Ehmed Bahadîn Şaban û akademîyenê huqûqê mîyanneteweyî Raîde Zebhanî û xeylêk roşnvîr, akedemîsyen û huqûqnasî tewrê panelî bîyî.

Serekîya panelî Vervatoxê Înîsîyatîfê Rayber Ocalanî rê Azadîye yê Erebî Îlhami El Milêcî kerd. Panel de qala têkoşîn û fîkranê azadan ê Rayberê Şarê Kurdî Abdullah Ocalanî ame kerdene.Tewrbîyayoxan tecrîdo giran zî erjna û vat no tecrîd goreyê huqûqê mîyannetweyî nîyo. Tewrbîyayoxan ard ziwan ke muhakemekerdişê Abdullah Ocalanî sîyasî yo û bale ante bêvengîya hêzanê mîyanneteweyî yê vera sîstemê Îmraliyî ser. Tewrbîyayoxan waşt semedê azadîya fîzîkîye ya Abdullah Ocalanî wa gamê aktîfî bêrê eştene.

Peynîya panelî de semedê azadîya Rayberê Şarê Kurdî Abdullah Ocalanî û çareserkerdişê meseleya kurdan bale ameye antene tay nuqtayan ser û ame vatene ke wa hêzê mîyanneteweyî û dezgehê eleqedarî şirê hukmatê tirkî ser ke problemî bêrê çareserkerdene.