Yewina Antî-Terorî bi serekîya Mesûd Barzanî 2011 de sey parçeyêkê Konseya Asayîşî ya Herêma Kurdîstanî (EAHK) ronîya.. Na konseye 5 endaman ra yena pê; hîrêyê ci YNKyî ra, diyê ci PDKyî ra yê. Pratîk de no dezgeh binê kontrolê Barzanî-PDK-MÎTî de yo. Coka eşkerayîyê nê dezgehî ê Barzanîyan û PDKyî yê.

Ganî derheqê nê dezgehan de cewab bêro dayene tayê persanê kurdan ê winayênan

-Erkê nê dezgehî yo raştikên çita yo? Kamî ra ferman gêno? Barzanîyan ra ber mesuldarîya ci verê ê bînan de est a?

-Nameyê ci her çiqas 'Yewina Antî-Terorî' biba zî verê şarê Kurdîstanî de bo dezgeh çend mesuldar o? Seba pawitişê kurdan heta nika çi xizmet kerdo? Mesuldarîyê dezgehî pawitişê menfaetanê Barzanîyan o?

-Nê dezgehî heta nika ke hêrişê dewleta tirke şermezar kerd?

-Vera hêrişanê dewleta tirke nêmojnayîşê tewir û refleksan yeno çi mana?

-Yewina Antî-Terorî gelo heta nika cînayetê MÎT, ajanan û kontrayî deşîfre kerdê?

-No dezgeh kurdan rê çi fayde dano?

-No dezgeh çira dişmenanê têgêrayîşanê kurdan de têkilîye virazeno?

Nika zî ma biewnê ke Yewina Antî-Terorî senî xebitîyena;

-Yewina Antî-Terorî serranê peyênan de 22 hêrişanê hewayî yê dewleta tirke de cade eşkerayîye daye. Nê eşkerayîyî seke hetê MÎTî ra nusîyayê înan hendê xîret kerdêne ke hêrişan meşrû bikerê.

-Nê eşkerayîyan de eşkerayîyê MÎT û artêşa tirke ameyî esaskerdene û qalê mergê sivîlan nêame kerdene.

-No dezgeh seba ajankerdişê şarî û deşîfrekerdişê cayanê gerîlayan xebatan keno.

-Hêrişê dewleta tirke de, 23yê tebaxe de di rojnamegerî Gulîstane Tara û Hero Bahadîn ameybî qetilkerdene. Nê hêrişî ra dima cade Yewina Antî-Terorî eşkerayîyêke daye û rojnamegerî sey endamê PKKyî mojnayî. Tedeyîya na eşkerayîye hetê MÎTî ra nusîyaya û yewine zî servîsê çapemenîye kerde.

Medyaya Barzanîyan zî seba ke hêrişanê dewleta tirke meşrû bikera Têgêrayîşê Azadîye û sivîlan sûcdar kena. Nê kerdişan ra tayê nimûneyî wina yê:

-8ê teşrîna peyêne ya 2020î / Basnews: Fermandarê pêşmergeyan Qasim Şeşoyî vat ke herêma Bara ya Sîncarî de wesayîtêkê şerwananê PKKyî hetê dewleta tirke ra ame hedefkerdene.

-1ê sibata 2022yî / Rûdaw: Tirk3iya vera Mexmûrî hêrişêkê hewayî yo newe kerd. Selahîyetdarêkê Mexmûrî Rûdawî rê pare kerd ke hêriş de sivîlî û şerwanê PKKyî zî tee 8 kesî merdî, 17 kesî birîndar bîyî.

-21ê gulana 2022yî / Rûdaw: Wesayîtêk bi gumanê hêrişê hewayî ame hedefkerdene. 

-21ê gulana 2022yî / Rûdaw: Silêmanî de hêrişê hewayî yê gumanbarî yê dewleta tirke de 5 kesî merdî.

-15ê hezîrana 2022yî / Rûdaw: Tirkîya bi dronêkî baregehêkê YBŞyî hedef kerd.

-15ê hezîrana 2023yî / Rûdaw: Hêrişê hewayî yê dewleta tirke de 2 kesî merdî.

-23yê gulana 2023yî / Rûdaw: Hêrişê dronî yê dewleta tirke de, Şingal de 3 endamê YBŞyî kişîyayî.

-1ê hezîrana 2023yî / Rûdaw: Wesayîtê hewayî yê dewleta tirke Şingal kerd hedef.

-11ê tebaxa 2022yî / Rûdaw: Silêmanî de hêrişê droneyê çekdarî de 3 kesî merdî.

-24ê tebaxa 2023yî / K24: Mudirîya Têkoşînê Terorî yê Herêma Kurdîstanî eşkerayîya xo de pare kerd ke hêrişê droneyê çekdarî yê dewleta tirke de xeymêka PKKyî kerde hedef û çar milîtanî kiştî.

-14ê teşrîna verêne ya 2023yî / Rûdaw: Droneyê çekdarî yê dewleta tirke de Dihok de endamê PKKyî kerdî hedef.

-9ê teşrîna verêne ya 2023yî / Rûdaw: Nêzdîyê Kerkûkî de hêrişê hewayî yê dewleta tirke de cinîyêke merde.

-26ê teşrîna verêne ya 2023yî / K24: Hêrişanê dewleta tirke de 9 milîtanê PKKyî kişîyayî.

-2yê nîsana 2024î / Rûdaw: Droneyê çekdarî yê dewleta tirke Şingal de fermandarêkê PKKyî kişt.

-8ê temmuza 2024î / K24: Şingal de vera wesayîtê PKKyî hêrişê dronî.

-23yê tebaxa 2024î / K24: Droneyêkê çekdarî yê dewleta tirke nêzdîyê Tepereşê yê Silêmanî de wesayîtêkê PKKyî kerd hedef û şofor û raywanî kişîyayî.