Platformê Dezgehanê Demokratîkan Êlih de vera destsernayîşê îradeyî Mîtîngê Azadîye û Demokrasîyî keno. 

Mîtîng de hêverî Hemserekê DBPyî Keskîn Bayindirî qisey kerd. Bayindirî pare kerd ke şarê kurdî mîyanê xoverdayîşî de yo ke no xoverdayîş qetî ser bikewo. Bayindirî vat: ''Xoverdayîşê şarê kurdî do meseleya kurdan çareser bikero û Rayber Apoyî azad bikero. Rayber Apo hema zî binê tecrîdî de yo. Seba çareserîye adres Îmrali yo. Qeyûmî çareserîye nîyê. Şarê kurdî seba prosesê neweyî amade yo. Wa Rayber Apo azad bibo û meseleya kurdan çareser biba.''

Bayindirî ra dima aktîvîsta TJA Ayla Akat Ata qisey kerd. Ayla vat: ''Şarê ma qeyûmî rê vano ney. Êlih ê şarê ma yo. Îqtîdar îradeyê şarê ma ra terseno. Qeyûm her çî ra ver dişmenê cinîyan o. Embaza ma Gulistan bi rayanê rekorî Êlih de bîye hemşaredare û qeyûmî rê cewab da. Ê 'Jin, Jiyan, Azadî' ra tersenê. Polîtîkayê qeyûman çareserîye nêarê. Seba çareserîye wa berê Îmraliyî bêrê akerdene.''

Hemsereka DEM Partî Tulaye Hatîmogullari zî xîtabê şarî kerd. Tulaye îfade kerd ke qeyûm dizd o û vat: ''Ma terefgîrê haştîya rûmetêne yê. Şarê kurdî haştîye wazeno qeyûman ney. Eke îqtîdar raşta zî çareserîye wazeno wa qeyûman ra fek vera bido û berê Îmraliyî abikero. Erdogan û Bahçelî qalê haştîya zereyî kenê la qeyûman tayînê îradeyê şarî kenê. Ma seba muzakereyan zî seba têkoşînî zî amade yê. Şarê ma perwerdeyê bi ziwanê dayîke wazeno. Wa îqtîdar cewabê waştişanê şarê ma bido. Ma sey cinîyan vera polîtîkayanê qeyûmî vanê 'Jin, Jiyan, Azadî.' ''